Vote Awareness : मतदानाची टक्केवारी वाढविण्यासाठी गृहनिर्माण सोसायट्यांचा सहभाग

पुणे : शहरी भागातील मतदानाची टक्केवारी वाढविण्यासाठी गृहनिर्माण सोसायट्यांचा सहभाग वाढविण्यासाठी प्रयत्न करण्यात येत आहेत. लोकसभा निवडणुकीत अधिकाधिक मतदान होण्याच्या दृष्टीने ३५ गृहनिर्माण सोसायट्यांमध्ये मतदानाची सुविधा उपलब्ध करुन देण्यात आली आहे. गृहनिर्माण सोसायट्यांच्या पदाधिकाऱ्यांनी मतदार जागृती करावी, असे आवाहन जिल्हाधिकारी तथा जिल्हा निवडणूक अधिकारी डॉ. सुहास दिवसे यांनी केले.

जिल्हाधिकारी कार्यालयात गृहनिर्माण सोसायट्यांच्या पदाधिकाऱ्यांसमवेत बैठक नुकतीच पार पडली. उपजिल्हा निवडणूक अधिकारी मीनल कळसकर, स्वीप समन्वयक अधिकारी अर्चना तांबे, जिल्हा उपनिबंधक (ग्रामीण) प्रकाश जगताप, पुणे जिल्हा सहकारी गृहनिर्माण संस्था आणि अपार्टमेंट महासंघाचे अध्यक्ष सुहास पटवर्धन तसेच पुणे आणि पिंपरी चिंचवड शहरातील गृहनिर्माण सोसायट्यांचे पदाधिकारी या वेळी उपस्थित होते.

डॉ. दिवसे म्हणाले, ‘‘जिल्ह्यात गृहनिर्माण संस्था आणि अपार्टमेंटमध्ये मतदारांची संख्या अधिक आहे. अधिकाधिक मतदान होण्याच्या दृष्टीने ३५ गृहनिर्माण सोसायट्यांमध्ये मतदानाची सुविधा उपलब्ध करून दिली आहे. मतदारांना मतदान केंद्राची माहिती होण्यासाठी क्यूआर कोड संस्थेच्या दर्शनी भागात लावण्यात यावा.’’

महासंघाचे अध्यक्ष पटवर्धन म्हणाले, ‘‘गृहनिर्माण सोसायट्यांच्या पदाधिकाऱ्यांनी मतदार ओळख पत्र आणि मतदार ओळख चिठ्ठी देण्यासाठी येणाऱ्या अधिकाऱ्यांना सहकार्य करावे. सहकारी गृहनिर्माण संस्थांसाठी नोडल अधिकारी नेमण्यात आले आहेत. त्यांच्याशी समन्वय ठेवून सोसायट्यांनी जास्तीत जास्त मतदान होईल, यासाठी प्रयत्न करावेत.’’

‘नो युवर पोलिंग स्टेशन’

मतदारांच्या सुविधेसाठी ‘नो युवर पोलिंग स्टेशन’ उपक्रम राबविण्यात येत आहे. मतदारांना हेल्पलाइन क्रमांक उपलब्ध करून देण्यात आले आहेत. मतदान केंद्रांची माहिती देण्यासाठी मोबाईल ॲपची सुविधा देण्याचा प्रशासनाचा प्रयत्न आहे. मतदार नोंदणी झालेल्या जास्तीत जास्त मतदारांना मतदानासाठी प्रवृत्त करावे, असे आवाहन डॉ. दिवसे यांनी केले.