Baramati ST Stand: ५० कोटी खर्च करून बनवलं विमानतळासारखे एसटी स्टँड पण... बारामतीमध्ये परिवहन मंडळाचे आर्थिक नुकसान

बारामती, ता. ३१ : शहरात सुमारे ५० कोटी रुपये खर्चून उभारलेल्या बसस्थानकातील आगार व इतर मूलभूत सुविधा कार्यान्वित होत नसल्याने राज्य परिवहन महामंडळाचे आर्थिक नुकसान होत असून प्रवाशांनाही याचा फटका बसत आहे. बसस्थानक असले तरी आगार म्हणून वापर होत नसल्याचे समोर आले आहे.

बारामतीत सुमारे ५० कोटी रुपये खर्च करून अद्ययावत बसस्थानक उभारले गेले. दोन मार्च रोजी या बसस्थानकाचे उद्‍घाटन झाले. परंतु जुलै महिना संपूनही बारामती आगाराचे कामकाज अजूनही एमआयडीसी आगारातूनच चालविले जात आहे. अत्यंत सुसज्ज जागा उपलब्ध करूनही बारामतीपासून सात किलोमीटर अंतरावरील एमआयडीसी आगारात बारामती आगाराच्या बसेस रात्री पार्किंगसाठी नेल्या जातात.

दररोज चौदा किलोमीटर अंतराचे डिझेल यात खर्ची पडत आहे. बारामती आगाराच्या ८४ बसेसचा दररोजचा हिशेब केला तर यात हजारो रुपये दर दिवशी खर्ची पडतात. शिवाय एमआयडीसीमधून गाडी बारामती बसस्थानकावर येतानाही अनेकदा उशीर होतो, त्याचा फटका प्रवाशांना बसतो.

उद्‍घाटनानंतर पाच महिन्यांचा कालावधी उलटूनही अद्याप डिझेल व सीएनजी पंप कार्यान्वित झालेला नाही. इंधन भरायलाही बसेसला एमआयडीसीत जावे लागते. त्यातही वेळ वाया जातो. या बसस्थानकावर नव्याने ४३ गाळे बांधले आहेत. पूर्वीच्या बसस्थानकावर असलेल्या नऊ व्यावसायिकांपैकी पाच जणांना जागा देण्यात आली असून उर्वरित गाळे गेले पाच महिने बंद अवस्थेत आहेत. याचे लिलावच होत नसल्याने परिवहन मंडळाचे आर्थिक नुकसान होत आहे.

बसस्थानक उभारण्यास दोन वर्षांचा कालावधी गेला या काळात या स्थानकावर ४३ गाळे उभारले जाणार याची माहिती असूनही त्या काळात लिलावप्रक्रीयेबाबत काहीच हालचाली झाल्या नाहीत. या बसस्थानकावर उभारण्यात आलेल्या चालक-वाहक विश्रांती कक्षाचाही वापर अद्याप सुरू झालेला नसल्याने त्याचाही उपयोग होत नाही. मुक्कामासाठी असलेल्या गाड्याच्या चालक वाहकांना येथे उत्तम सोय दिली आहे.