डिंभे धरणाच्या विसर्गामुळे नदीकाठच्या गावांना इशारा

घोडेगाव, ता. ४ ः आंबेगाव तालुक्यात पश्चिम आदिवासी भागात दोन दिवस मुसळधार पावसामुळे जनजीवन विस्कळित झाले आहे. अहुपे, भीमाशंकर व पाटण खोऱ्यात मुसळधार पावसामुळे ओढे, नाल्यांना मोठ्या प्रमाणात पाणी आले. तर बुब्रा नदी व घोड नदी दुथडी भरून वाहत आहे. डिंभे धरणात मोठ्या प्रमाणावर पाण्याची आवक होत असून सध्या धरणातून १८,००० क्युसेसने पाणी सोडले जात आहे. कालच प्रशासनाने नदीकाठच्या गावांना पाणी सोडा असल्याचा इशारा दिला असल्यामुळे कोणतीही जीवित अगर इतर हानी झालेली नाही.

गेली दोन दिवस पडत असलेल्या मुसळधार पावसामुळे डिंभे धरण दुपारी तीन वाजेपर्यंत ९३.४५ टक्के भरले होते. धरणातील एकूण साठा १०.९२ टीएमसी झाला आहे. धरणात २८ हजार क्युसेसने पाणी येत असून धरणातून १८ हजार क्युसेसने पाणी सोडले जात आहे. पूर नियंत्रण करण्यासाठी अजूनही घोड नदीत पाणी सोडले जाणार असल्याचे अधिकाऱ्यांनी सांगितले. धरणातून सकाळी सात वाजता २५०० क्युससने, साडेचार वाजता सात हजार पाचशे क्युसेसने, सकाळी नऊ वाजता नऊ हजार क्युसेसने तर दुपारी बारा वाजल्यापासून १८ हजार क्युसेसने पाणी सोडले जात आहे.

धरण परिसरात आज २१ मिलिमीटर पावसाची नोंद झाली आहे तर, आजअखेर एकूण पाऊस ६४४ मिलिमीटर पडला आहे. आवटे भीमाशंकर पाटण खोऱ्यात मुसळधार पावसाने आदिवासी जनतेचे जनजीवन विस्कळीत झाले आहे, पुढे नाल्यांना पूर आल्यामुळे नागरिक घराबाहेर न पडता आपल्या घरातच सुरक्षित राहिले आहेत. येथील मुख्य पीक असणारे भात याची पाच हजार १०० हेक्टर क्षेत्रात आजपर्यंत लागवड झाली आहे.

आंबेगाव तालुक्यातील मंडलनिहाय्य ‘क’ आज पडलेला पावसाची नोंद पुढीलप्रमाणे
घोडेगाव ३८.३ मिलिमीटर, आंबेगाव २२६.३ मिलिमीटर, कळंब वीस मिलिमीटर, पारगाव ७.३ मिलिमीटर, मंचर दहा मिलिमीटर.