तीस गुंठ्यात फुलविली सजावटीच्या सूर्यफुलांची शेती

सासवड शहर, ता. ३१ : सासवड (ता. पुरंदर) येथील शेतकरी विलास गंगाधर जगताप यांनी सजावटीसाठी लागणाऱ्या सूर्यफुलाचे उत्पादन घेतले व नवरात्र व दसऱ्याला त्याची विक्री करून सुमारे एक लाख ७० हजार रुपयांचे उत्पन्न मिळविले. ''विकेल ते पिकेल'' उक्तीनुसार जगताप यांनी योग्य नियोजन करून भरघोस उत्पादन घेण्याची किमया साधली आहे. लग्न समारंभ, वाढदिवस तसेच विविध मंदिरांच्या सजावटीसाठी आवर्जून वापर केला जात असल्याने सूर्यफुलांच्या फुलांना सध्या मोठी मागणी वाढली आहे.

जगताप यांनी प्रथम नांगरट केल्यानंतर फणपाळी केली. त्यानंतर चार फुटांवर ठिबक सिंचनाचे पाइप टाकले. सकाटा विन्सेंट - २ या वाणाचे सुमारे एक बाय एक फुटावर टोकन केले. त्या अगोदर १०/२६/२६ एकरी दोन बँग व सुष्म व दुय्यम अन्नद्रव्ये १० किलो प्रत्येक एकरी वापरली. ६ ते ७ दिवसांनी उगवण झाली. पिकावर मावा, तुडतुडे होऊ नये म्हणून औषध फवारणी केली. उगवण झाल्यानंतर दोन दिवसांनी १० लिटर व ४५ दिवसांनी २० लिटर पाणी ठिबकद्वारे दररोज दिले. यामुळे जोमदार पीक बहरले.
दरम्यान, विलास जगताप यांना पॅकिंगच्या कामात मुलगा शुभम जगताप, पत्नी रेखा जगताप, शंकर जवळकर यांचे मोलाचे सहकार्य लाभले.

लग्न समारंभ, वाढदिवस, सभा अशा कार्यक्रमासाठी या सूर्यफुलांचा वापर होतो. ते कळीत असताना कापले जाते. फ्लॉवर पॉटमध्ये ठेवले तर ते १४ ते १५ दिवस ताजे राहते. फूल कळीत कापले जाते फ्लावर पाँटमध्ये ठेवले तर हे फूल १४ ते १५ दिवस राहते. तर बाहेरील मोकळ्या हवेत ३ ते ४ दिवस राहते. अशा प्रकारे ३० गुंठ्यांत अडीच महिन्यात सूर्यफूल शेतीत एक लाख ७० हजार रुपये उत्पन्न मिळते.
- विलास जगताप, शेतकरी

गड्डीला यंदा१०० रुपये बाजारभाव
सूर्यफुलाच्या गड्डीला यंदा ८० रुपये ते १०० रुपये बाजारभाव मिळाला. सुमारे पाच फुलांची गड्डी असते. या पाच फुलांच्या गड्डीचे पॅकिंग करावे लागते. सजावटीच्या फुलात हल्ली सूर्य फुलांचा नंबर लागतो. पँकिंग केलेली फुले पुण्याच्या बाजार पेठेत पाठवली जातात.

07737