Pune News : ‘आदिवासी उमेदवारांकरता मोफत मार्गदर्शन, स्पर्धा परीक्षा पूर्वतयारी’; 1209 उमेदवारांना मिळाला हक्काचा रोजगार

मंचर : “राज्य सरकारच्या कौशल्य विकास रोजगार उद्योजकता व नाविन्यता विभागामार्फत १८ ते ३८ वयोगटातील इयत्ता दहावी उत्तीर्ण आदिवासी मुला-मुलींसाठी स्पर्धा परीक्षेच्या पूर्व तयारीसाठी मोफत प्रशिक्षण दिले जाते.

त्याचा फायदा अनेक विद्यार्थ्यांना हक्काचा रोजगार मिळण्यासाठी झाला आहे. आत्तापर्यंत प्रशिक्षण घेतलेल्या एक हजार २०९ उमेदवारांना शासकीय, निमशासकीय व खाजगी आस्थापनांमध्ये रोजगार मिळालेला आहे.” अशी माहिती कौशल्य विकास रोजगार व उद्योजकता माहिती व मार्गदर्शन केंद्राचे प्रमुख सां.ब मोहिते यांनी दिली.

मंचर (ता.आंबेगाव) येथील पोस्ट ऑफिसजवळ आदिवासी उमेदवारांकरीता कौशल्य विकास रोजगार व उद्योजकता माहिती व मार्गदर्शन केंद्रात साडेतीन महिने स्पर्धा परीक्षा प्रशिक्षण पूर्ण केलेल्या उमेदवारांना प्रमाणपत्र वाटप मोहिते यांच्या हस्ते झाले.

यावेळी ते बोलत होते. यावेळी स्पर्धा केंद्राचे महेश कोलते उपस्थित होते. विषय शिक्षक जितेंद्र त्रिवेदी, शीतल चासकर, रेश्मा आवटे, अर्चना गुंजाळ यांनी उमेदवारांना गणित, इंग्रजी, लिपिक योग्यता चाचणी, सामान्य ज्ञान, मुलाखतीचे तंत्र आदी विषयांवर मार्गदर्शन केले.

“येथे अत्यंत दर्जेदार व परिपूर्ण प्रशिक्षण दिले जाते. प्रशिक्षण कालावधीमध्ये उमेदवारांना एक हजार रुपये विद्यावेतन मिळते.रोजगारासाठी हे प्रशिक्षण उपयुक्त आहे.”असे प्रशिक्षणार्थी नम्रता किर्वे, श्वेता केंगले, अस्मिता घोटे, चैत्राली शेळके, प्रदीप बोकड, आकाश ढवळे, वैभव मते, तुषार किरवे, आकाश जुमनाके यांनी सांगितले. स्नेहल आंबेकर यांनी सूत्रसंचालन व मंगेश गाडेकर यांनी आभार मानले.

ते म्हणाले, ‘‘प्रशिक्षण कालावधीमध्ये उमेदवारांना एक हजार रुपये विद्यावेतन दिले जाईल. प्रशिक्षणाचे हे १०७ वे सत्र आहे. उमेदवारांना साडेतीन महिने स्पर्धा परीक्षा प्रशिक्षण दिले जाते. दरम्यान, हे प्रशिक्षण पूर्ण वेळ असून गणित, इंग्रजी, लिपिक योग्यता चाचणी, सामान्य ज्ञान हे विषय शिकवले जातात. उमेदवारांना स्वयंरोजगार माहिती मार्गदर्शन केले जाते.

प्रशिक्षण पूर्ण झालेल्या शासकीय निमशासकीय व आस्थापनांमध्ये वर्ग तीन पदासाठी निवड होण्यास या प्रशिक्षणाचा लाभ होऊ शकतो. १८ ते ३८ वयोगटातील दहावी उत्तीर्ण मुला-मुलींसाठी हे प्रशिक्षण आहे.

प्रशिक्षण कालावधीमध्ये निवास व भोजनाची उमेदवारांना स्वतः व्यवस्था करावी लागेल. उमेदवारांनी सर्व मूळ शैक्षणिक पात्रतेच्या व सक्षम अधिकाऱ्यांनी दिलेल्या जातीच्या दाखल्यासह मुलाखतीसाठी हजर राहावे. अधिक माहितीसाठी मोबाईल क्रमांक (०२१३३) २२३०८१ येथे संपर्क साधावा.

‘‘कौशल्य विकास रोजगार, उद्योजकता व नावीन्यता विभागामार्फत मंचर येथील पोस्ट ऑफिसजवळ आदिवासी उमेदवारांच्या प्रशिक्षण केंद्रामध्ये दोन हजार ८०१ उमेदवारांनी प्रशिक्षण पूर्ण केले आहे. त्यापैकी एक हजार २०९ उमेदवारांना शासकीय, निमशासकीय व खासगी आस्थापनांमध्ये रोजगार मिळालेला आहे. आदिवासी युवक व युवतींनी मोफत प्रशिक्षणाच्या संधीचा लाभ घ्यावा.’’
-सां. ब. मोहिते, मार्गदर्शन अधिकारी, कौशल्य विकास रोजगार व उद्योजकता माहिती, मंचर