Pune News : पुरंदरे तलावाच्या खोलीकरामुळे मिळणार शाश्‍वत पाणी

मोरगाव : पुरंदरे पाझर तलाव मुर्टी, मोढवे, नावळी या गावांसाठी शेती आणि पिण्याच्या पाण्यासाठी वरदान ठरला आहे. अमृत सरोवर अभियानांतर्गत रेलफोल फाउंडेशनच्या माध्यमातून खोलीकरण व गाळ उपशाचे काम सुरू आहे. मोढवे (ता. बारामती) येथे आत्तापर्यंत ३० हजार ब्रास गाळाचा उपसा केला आहे. यामुळे साठा वाढून शाश्‍वत पाणी उपलब्ध होणार असल्याने परिसरातील शेतकऱ्यांनी समाधान व्यक्त केले आहे.

तलावाचे खोलीकरण व गाळ काढण्याचे काम २८ फेब्रुवारी २०२३ पासून सुरू आहे. आजपर्यंत ७५०० टिपर गाळाची माती अनेक शेतकऱ्यांनी शेतामध्ये टाकली आहे. गाळउपसा पाऊस पडेपर्यंत सुरूच राहणार आहे. उपशामुळे पाणीसाठ्यात वाढ होणार आहे.

भविष्यात तलाव भरल्यानंतर मुर्टी, मोढवे, मोराळवाडी या गावांना चांगला फायदा होणार आहे. मुर्टी, मोढवे, नावळी या गावांच्या पाणीपुरवठा विहिरी अवलंबून आहेत. बारामतीच्या जिरायती भागातील मोरेवाडी, उंबरवाडी याशिवाय पुरंदर तालुक्यातील नावळी या गावासाठी अनेक वर्षांपासून पुरंदरे पाझर तलाव उपयुक्त ठरला आहे. या तलावाच्या बाजूला असलेल्या विहिरी तसेच जलस्रोत बळकट होणार आहेत.

मुर्टी, मोढवे ग्रामपंचायतच्या विशेष पाठपुराव्यामुळे पुरंदरे पाझर तलावातील गाळ काढण्याच्या कामास प्रारंभ करण्यात आला. तलावातील गाळरूपी काळी माती चोपन पडीक क्षेत्रात टाकल्यामुळे जमिनीची सुपीकता वाढून, ती जमीन लागवडीखाली येण्यास भरीव मदत होणार आहे. याशिवाय तलावाच्या बाजूलाच पाणीपुरवठा विहिरी असल्यामुळे पावसाळ्यात तलाव पूर्ण क्षमतेने भरल्यानंतर जलस्रोत बळकटीकरण होणार आहेत.

रेल फोन फाउंडेशनबद्दल कृतज्ञता
पुरंदरे पाझर तलावातील गाळ उपशासाठी अमृत सरोवर अभियानांतर्गत रेल फोल फाउंडेशनने येथील गाळाचा उपसा करण्यास स्वयंस्फूर्तीने पाठपुरावा करून योग्य नियोजन केले. याबद्दल फाउंडेशनच्या उपक्रमाविषयी आम्ही शेतकरी मनापासून कृतज्ञता व्यक्त करतो, अशी भावना मुर्टीचे उपसरपंच किरण जगदाळे मोढवेच्या सरपंच शीतल मोरे यांनी व्यक्त केली.