नारायणगाव परिसरात मुसळधार पाऊस

नारायणगाव, ता. १० : सोसाट्याचा वारा, ढगांचा गडगडाट व विजांच्या कडकडाटासह नारायणगाव परिसरात शुक्रवारी दुपारी मुसळधार पाऊस झाला. सोसाट्याचा वाऱ्यामुळे वीजपुरवठा खंडित झाला होता. पावसामुळे हवामानात आल्हाददायक गारवा निर्माण झाला. शुक्रवारी दुपारी अडीच वाजण्याच्या सुमारास सोसाट्याचा वारा, ढगांचा गडगडाट व विजांच्या कडकडाट पाऊस सुरू झाला. अचानक आलेल्या पावसामुळे शेतात काढून ठेवलेला कांदा भिजला. यावेळी कांदा झाकून ठेवण्यासाठी शेतकऱ्यांची धावपळ उडाली. सोसाट्याच्या वाऱ्यामुळे आंब्याच्या झाडाला लगडलेल्या कैऱ्या पडून व उन्हाळी बाजरीच्या उभ्या पिकाचे नुकसान झाले. दुपारी तीन वाजेपर्यंत ढगांचा गडगडाट व विजांच्या कडकडाटासह पाऊस सुरू होता. अचानक आलेल्या पावसामुळे लोकसभा निवडणुकीच्या अंतिम टप्यांत सुरू असलेला प्रचार थंडावला.