अण्णा भाऊ साठे यांच्या विचारांचे आचरण करावे : डॉ. शीतल माने-पवार

इंदापूर, ता. २ : साहित्यरत्न अण्णा भाऊ साठे यांचे विचार हे फक्त जयंती, पुण्यतिथी पुरते मर्यादित न ठेवता त्यांचे विचार अंगीकार करून त्याप्रमाणे आचरण करावे, असे आवाहन इंदापूर येथील कला, विज्ञान आणि वाणिज्य महाविद्यालयाच्या हिंदी विभाग प्रमुख डॉ. शीतल माने-पवार यांनी केले.

इंदापूर येथील डॉ. बाबासाहेब आंबेडकर मुलांचे शासकीय वसतिगृह येथे लोकशाहीर अण्णाभाऊ साठे यांच्या जयंतीनिमित्त आयोजित कार्यक्रमात डॉ. शीतल माने-पवार बोलत होत्या.

यावेळी बोलताना त्या म्हणाल्या, लोकशाहीर साहित्यरत्न अण्णाभाऊ साठे यांचे कार्य प्रेरणादायी ठरणारे आहे. अण्णाभाऊ यांनी आपल्या कविता, कथा व कादंबरी यांच्या माध्यमातून समाज प्रबोधनाचे कार्य केले. तरुण पिढीने त्यांच्या विचारांचे अनुकरण करण्याचे आवाहन केले. वसतिगृहाचे गृहपाल प्रशांत हेळकर यांनी प्रस्ताविक केले; तर विशाल चव्हाण यांनी सूत्रसंचालन व आभार अभिजित वजाळे यांनी मानले.