Otur Crime : तीन महिन्यांपूर्वी विवाह झालेल्या मेंढपाळ नवदांपत्याची आत्महत्या

ओतूर - तीन महिन्यांपूर्वी विवाह झालेल्या मेंढपाळ नवदांपत्याने पिंपरी पेंढार (ता. जुन्नर) येथील नवलेवाडी येथे विहिरीत उडी मारून आत्महत्या केली. ही घटना शुक्रवारी (ता. २४) उघडकीस आली. मनीषा सोमनाथ कुलाळ (वय २०) व सोमनाथ संभाजी कुलाळ (वय २५, मूळ रा. जांभूत, ता. संगमनेर, जि. नगर; सध्या रा. पिंपरी पेंढार), असे या दांपत्याचे नाव असल्याची माहिती ओतूर पोलिस ठाण्याचे सहायक पोलिस निरीक्षक सचिन कांडगे यांनी दिली.

कुलाळ हे मेंढपाळ दांपत्य मेंढ्यांसह पिंपरी पेंढार गावाच्या नवलेवाडी परिसरात वास्तव्यास होते. गुरुवारी मध्यरात्री ते शुक्रवारी पहाटेच्या सुमारास या पती-पत्नीने नवलेवाडी येथे विहिरीमध्ये उड्या मारल्याची माहिती पोलिसांना मिळाली. त्यानंतर जुन्नर येथील रेस्क्यू टिम, ओतूर पोलिस व स्थानिक नागरिक यांनी विहिरीतून त्यांचे मृतदेह बाहेर काढले.

मनीषा आणि सोमनाथ यांचा २२ डिसेंबर २०२२ रोजी विवाह झाला होता. या दोघांच्या आत्महत्येचे कारण समजले नाही. मात्र, किरकोळ वादातून ही आत्महत्या झाली असल्याची चर्चा या परिसरात आहे. ओतूर पोलिसांनी या घटनेची अकस्मात मयत म्हणून नोंद केली आहे. याबाबत रामा बिंदू डोमारे यांनी ओतूर पोलिसांत खबर दिली आहे.