वादळी पावसाचा शेतकऱ्यांना फटका

01954
----
वादळी पावसाचा शेतकऱ्यांना फटका
खोची परिसर; घातलेला खर्च निघणार की नाही याची चिंता
खोची, ता. १२ : परिसरात झालेल्या वादळी वाऱ्याच्या पावसामुळे शेतकऱ्यांना आर्थिक फटका बसला आहे. भाजीपाला केलेल्या शेतकऱ्यांना घातलेला खर्च निघणार की नाही याबाबत चिंता लागली आहे. वळीव पावसामुळे शेतकऱ्यांचे आर्थिक गणित कोलमडले आहे. महापुराच्या संकटातून वारणाकाठचा शेतकरी सावरतो न सावरतो तोच वळीव पावसाने पुन्हा एकदा शेतकऱ्यावर आर्थिक संक्रांत आणली आहे. दोन दिवसांपूर्वी येथे सायंकाळी जवळपास दीड ते दोन तास व रात्री पुन्हा गारांच्या वर्षावात मुसळधार पाऊस झाला. या पावसामुळे शेतामध्ये असणारे टोमॅटो, कोबी, फ्लॉवर, काकडी, गवारी, भेंडी या पिकात पाणी साठून राहिल्यामुळे तसेच सोसाट्याच्या वाऱ्यामुळे पिकांनी जमिनीवर लोळण घेतली आहे. तसेच टोमॅटो पिक तुटून शेतामध्येच पडली असल्यामुळे शेतकऱ्यांचे लाखो रुपयांचे नुकसान झाले आहे. त्यातच टोमॅटोचे दरही उतरले असल्यामुळे या शेतकऱ्यांवर दुहेरी संकट कोसळले आहे. वादळी पावसामुळे आंब्याच्या कैऱ्या तुटून पडल्या आहेत. काकडी जागेवर कुजत आहे. कोबी, फ्लॉवर काळे पडले आहे. पावसामुळे घरांचेही नुकसान झाले आहे. अनेक घरांच्या छताचे पत्रे उडून गेले आहेत. त्यामुळे पावसाचे पाणी घरात साठल्यामुळे प्रापंचिक साहित्याबरोबरच धान्य भिजले असल्यामुळे पुढे काय खायचे हा प्रश्न निर्माण झाला आहे. जनावरांचा सुका चारा ही भिजल्यामुळे पावसाळ्यात जनावरांच्या चाऱ्याचा प्रश्‍न भेडसावणार आहे. शेतातही चिखल झाल्यामुळे भांगलण, ऊस भरणीची कामे खोळंबली आहेत.
----------
वादळी वाऱ्यासह येणारे पावसामुळे भाजीपाला उत्पादकांचे नुकसान झाले आहे. भविष्यात भाजीपाला करायचा का नाही याचा अभ्यास करूनच हे पीक घ्यावे लागणार आहे. यापूर्वी महापुरामुळे सोयाबीन जागेवर कुजले, याचा तोटा भरून काढण्यासाठी अनेक शेतकऱ्यांनी उन्हाळी सोयाबीन केला आहे.परंतु वादळी वाऱ्याचा पावसामुळे शेतात पाणी साठून आताही तीच परिस्थिती निर्माण झाली आहे.
- राजेंद्र मालगावे, शेतकरी, भेंडवडे