मराठीत पाट्या लावा शिवसेनेचा आग्रह

मराठी पाट्यांसाठी शिवसेना आग्रही रसायनी, ता. २० (बातमीदार) : वासांबे मोहोपाडा बाजारपेठेतील दुकानांच्या पाट्या मराठीत असाव्यात, यासाठी शिवसेनेने पुढाकार घेतला आहे. ग्रामपंचायत सरपंच ताई पवार, व्यापारी असोसिएशनचे अध्यक्ष प्रदीप पाटील यांना शिवसेनेच्या शिष्टमंळाने बुधवारी निवेदन दिले. मराठीत दुकानांच्या पाट्या न लावण्यास शिवसेनेकडून आंदोलन करण्यात येईल, असा इशारा देण्यात आला. रसायनीचे मुख्यालय असलेल्या या बाजारपेठेतील अनेक दुकाने व इतर आस्थापनांवरील फलक इंग्रजी भाषेमध्ये दिसत आहेत. सदर फलक मराठी भाषेत असावेत, यासाठी ग्रामपंचायतीने दुकानदारांना सूचना द्यावी, असा आग्रह शिवसेनेकडून करण्यात आला आहे. येत्या काही दिवसांत या पाट्या मराठीत दिसल्या नाहीत तर शिवसेना व युवासेना आंदोलन छेडत इंग्रजी पाट्यांना काळे फासण्यात येईल, असा इशारा देण्यात आला. या वेळी वासांबे मोहोपाडा विभाग प्रमुख अजय सावंत, माजी जिल्हा परिषद सदस्य सुरेश म्हात्रे, माजी सरपंच रोशन राऊत, सदस्य स्वप्निल राऊत, ज्येष्ठ शिवसैनिक मारूती खाने आदि उपस्थित होते. रसायनी : दुकानाच्या पाट्या मराठीत लावण्याबाबत निवेदन देण्यात आले.