यंदा ‘दगडूशेठ’ विसर्जन मिरवणुकीत पहिल्याच दिवशी सहभागी होणार ट्रस्टचे अध्यक्ष माणिक चव्हाण यांची पत्रकार परिषदेत माहिती

पुणे, ता. २३ : ‘‘श्रीमंत दगडूशेठ हलवाई गणपती यंदाच्या विसर्जन मिरवणुकीत पहिल्याच दिवशी दुपारी ४ वाजता सहभागी होणार आहे. यामुळे गेल्या अनेक वर्षांपासून विसर्जन मिरवणुकीत दुसऱ्या दिवशी सहभागी होण्याची दगडूशेठ गणपतीची परंपरा यंदापासून खंडित होणार आहे,’’ अशी माहिती दगडूशेठ हलवाई सार्वजनिक गणपती ट्रस्टचे अध्यक्ष माणिक चव्हाण यांनी बुधवारी (ता. २३) पत्रकार परिषदेत दिली.

या ट्रस्टच्या वतीने पुणे शहरातील विविध गणेश मंडळांना दिल्या जाणाऱ्या विविध पुरस्कारांची घोषणा करण्यासाठी बुधवारी (ता.२३) पत्रकार परिषद आयोजित केली होती. यावेळी ते बोलत होते. चव्हाण पुढे म्हणाले, ‘‘मागील अनेक वर्षे दगडूशेठ गणपतीची विसर्जन मिरवणूक परंपरेप्रमाणे मिरवणुकीच्या दुसऱ्या दिवशी पहाटे निघते. यामुळे अनंत चतुर्दशीच्या दिवशी गणपतीचे विसर्जन होत नाही. त्यामुळे यंदापासून विसर्जन मिरवणुकीत हा बदल केला आहे. लक्ष्मी रस्त्यावरून ही मिरवणूक निघते. परंतु, गणपती निघण्यास होणारा उशीर खूपच वाढत चालला आहे. मागील वर्षी दुसऱ्या दिवशी सकाळी ७.४५ वाजता दगडूशेठ गणपतीचे बेलबाग चौकात आगमन झाले होते. यामुळे भाविकांना दर्शनासाठी खूप ताटकळत राहावे लागले होते. हे टाळण्यासाठी आणि भाविकांच्या भावनांचा विचार करून यंदापासून हा बदल केला आहे.’’
अनेक गणेश मंडळे दुपारी चार वाजता मिरवणुकीत सहभागी होण्यासाठी फारशी उत्सुक नसतात. अशावेळी दुपारी ४ वाजण्याच्या सुमारास श्रीमंत दगडूशेठ हलवाई गणपती विसर्जन मिरवणुकीत लक्ष्मी रस्त्याने सहभागी होईल, असेही त्यांनी सांगितले.