पुणे विद्यार्थी गृहतर्फे ‘ज्ञानस्रोत’चे आयोजन

पुणे, ता. २६ : पुणे विद्यार्थी गृह आणि सावित्रीबाई फुले पुणे विद्यापीठातील रिसर्च पार्क फाउंडेशन यांच्या वतीने दोन दिवसीय ‘ज्ञानस्रोत’ कार्यक्रमाचे आयोजन करण्यात आले आहे, अशी माहिती संस्थेचे कार्याध्यक्ष सुनील रेडेकर यांनी पत्रकार परिषदेत दिली.
याप्रसंगी विनायक माढेकर, हाउस ऑफ सक्सेसचे प्रसाद मिरासदार, भुवनेश कुलकर्णी आदी उपस्थित होते. यावेळी रेडेकर म्हणाले, ‘‘विनायक माढेकर यांच्या पुढाकारातून ‘पँटेथलॉन २०२३’ हा सलग २४ तास पेंटिंग उपक्रम, ज्ञानसंवर्धन पुरस्कार, ई-कचरा संकलन व ब्लेडस ऑफ ग्लोरी क्रिकेट म्युझियमच्या विषयी माहितीपर सत्र आदींचा या ‘ज्ञानस्रोत’ कार्यक्रमात समावेश आहे. येत्या रविवारी (ता. १) सकाळी १० वाजता सावित्रीबाई फुले पुणे विद्यापीठातील मीडिया अँड कम्युनिकेशन स्टडीजच्या विभागप्रमुख डॉ. माधवी रेड्डी यांच्या हस्ते उद्‍घाटन होणार आहे. सोमवारी(ता. २) सकाळी ११ वाजता सावित्रीबाई फुले पुणे विद्यापीठाचे कुलगुरू डॉ. सुरेश गोसावी यांच्या हस्ते ‘पँटेथलॉन २०२३’चा समारोप व पेंटिगचे लोकार्पण करण्यात येणार आहे. तसेच विद्यापीठाच्या जयकर ग्रंथालयामध्ये व ग्रंथालय शास्त्रावर आधारित पुस्तकांचे लेखन करून महाराष्ट्रातील ग्रंथालयांना सक्षम मनुष्यबळ निर्माण करण्यामध्ये भरीव योगदान देणाऱ्या ९२ वर्षीय लेखक डॉ. शां. ग. महाजन यांना ‘ज्ञानसंवर्धन पुरस्कार’ देऊन सन्मानित करण्यात येणार आहे. ‘ज्ञानस्रोत’साठी रिसर्च पार्क फाउंडेशन, हाउस ऑफ सक्सेसचे सहकार्य लाभले आहे. आयआयटी अलाहाबाद येथील प्रयागराज विद्यापीठ यांच्याबरोबरही संस्थेने यासंदर्भात सामंजस्य करार केला आहे.’’
उपक्रमातून जमा होणारी चित्रे, पेंटिंग याचे स्वतंत्र प्रदर्शन भरविण्यात येणार आहे. गतवर्षीप्रमाणे यावर्षी देखील विक्री होणाऱ्या पेंटिंगची रक्कम संस्थेस देणगी देणार असल्याचे विनायक माढेकर यांनी सांगितले.