कार्तिकेय गणेशन यांना अवचट स्मृती सन्मान

पुणे, ता. २ : मुक्तांगण व्यसनमुक्ती केंद्राच्या संस्थापक डॉ. अनिता अवचट यांच्या स्मृतीप्रित्यर्थ दरवर्षी देण्यात येणारा डॉ. अनिता अवचट स्मृती संघर्ष सन्मान पुरस्कार यंदा चेन्नई येथील सृष्टी फाउंडेशनचे कार्तिकेय गणेशन यांना, तर डॉ. अनिल अवचट यांच्या पहिल्या स्मृतिदिनानिमित्त यावर्षीपासून देण्यात येणारा डॉ. अनिल अवचट स्मृती सृजन सन्मान पुरस्कार मिरज येथील भारतीय तंतुवाद्य केंद्राला देण्यात येणार आहे, अशी माहिती मुक्तांगण व्यसनमुक्ती केंद्राच्या संचालक डॉ. मुक्ता पुणतांबेकर यांनी दिली.
प्रत्येकी वीस हजार रुपये आणि स्मृतिचिन्ह असे या पुरस्काराचे स्वरूप आहे. पुरस्काराचे वितरण संशोधक अरविंद गुप्ता यांच्या अध्यक्षतेखाली येत्या रविवारी (ता. ५) कोथरूड येथील एम. ई. एस बालशिक्षण मंदिर सभागृहात सकाळी अकरा वाजता होणार आहे. याप्रसंगी डॉ. आनंद नाडकर्णी पुरस्कार विजेत्यांशी संवाद साधणार आहेत.
कार्तिकेय गणेशन यांनी वैयक्तिक आयुष्यात विविध संघर्षांना सामोरे जात दिव्यांगांसाठी आशेचा किरण बनून प्रतिभाशाली परंतु दुर्लक्षित अशा या माणसांसाठी सृष्टी फाउंडेशनची स्थापना केली आहे. या फाउंडेशनमार्फत कौशल्याधारित शिक्षणाची सुविधा उपलब्ध करून देण्यात आली आहे. तर पहिल्याच डॉ. अनिल अवचट स्मृती सृजन सन्मान पुरस्काराचे मानकरी ठरलेल्या भारतीय तंतुवाद्य केंद्राने भारतीय शास्त्रीय संगीताचा अविभाज्य घटक असलेल्या तंतुवाद्यांच्या निर्मितीची परंपरा जपली आहे. याबद्दल केंद्राचे नौशाद गुलाबसाहेब यांना सन्मानित करण्यात येणार आहे.