राज्य औषध व्यवसाय परिषदेवर जगन्नाथ शिंदे

राज्य औषध परिषदेवर
पाच जणांची नियुक्ती

पुणे, ता. १६ : अखिल भारतीय औषध विक्रेता संघाचे अध्यक्ष जगन्नाथ शिंदे आणि केमिस्ट असोसिएशन ऑफ पुणे डिस्ट्रिक्टचे सचिव अनिल बेलकर यांच्यासह पाच जणांची नियुक्ती राज्य औषध व्यवसाय परिषदेवर करण्यात आली. त्याबाबतचा आदेश राज्य सरकारने जारी केला. राज्य परिषदेच्या जून २०२२ मध्ये झालेल्या निवडणुकीत राज्यभरातील फार्मासिस्टमधून पाच सदस्यांची निवड करण्यात आली. फार्मसी कायदा १९४८ च्या तरतुदीनुसार नामनिर्देशित सदस्यांमधून शिंदे, बेलकर यांच्याशिवाय प्रवीण पाटील, दीपक कोठारी व धनंजय जोशी यांची नेमणूक झाली. गेल्या वर्षभरापासून प्रलंबित असलेल्या या नेमणुकीमुळे परिषदेच्या पदाधिकारी निवडीचा मार्ग मोकळा झाला आहे. राज्यातील सत्तांतरानंतर हा प्रश्न प्रलंबित होता. राज्यातील फार्मसी पदविका, पदवी, पदव्युत्तर शिक्षण घेऊन नोंदणी केलेल्या फार्मासिस्टच्या नोंदी ठेवणे, देखरेखीचे काम करणे तसेच वेळोवेळी ज्ञान व कौशल्य विकास, नवनवीन तंत्रज्ञानाचे प्रशिक्षण देण्याचे काम ही परिषद करते.