Maharashtra Weather Update : राज्यात पाऊस पुन्हा होणार सक्रिय

पुणे : बंगालच्या उपसागरात कमी दाबाचे क्षेत्र तयार झाले असून ते पश्चिम आणि उत्तर-पश्चिमेकडे सरकण्याची चिन्हे आहेत. त्यामुळे राज्यात पाऊस पुन्हा सक्रिय होईल, असा अंदाज भारतीय हवामानशास्त्र विभागाने वर्तविला आहे.

कमी दाबाच्या क्षेत्रामुळे कोकण-गोव्यासह मध्य महाराष्ट्र, मराठवाडा आणि विदर्भात सर्वत्र मॉन्सून पुन्हा सक्रिय होण्याची शक्यता आहे. विदर्भ, मराठवाड्यात बुधवारपासून (ता. ६) तर राज्यात गुरुवार (ता. ७) आणि शुक्रवारी (ता. ८) बहुतांश ठिकाणी पावसाची शक्यता आहे. याशिवाय कोकण किनारपट्टीलगत बुधवारपासून पावसाचा जोर वाढणार आहे.

कोकणात तुरळक ठिकाणी मुसळधार पावसाची शक्यता आहे. पुण्यासह नाशिक, सातारा जिल्ह्यातील घाट भागात तुरळक ठिकाणी मुसळधार पावसाचा अंदाज आहे. भंडारा, गडचिरोली, नागपूर, वर्धा जिल्ह्यात बुधवारी ‘ऑरेंज अलर्ट’ दिला आहे. कमी दाबाचे क्षेत्र विदर्भाकडून मराठवाड्याकडे सरकरण्याची चिन्हे आहेत. त्यामुळे मराठवाड्यातही दोन दिवसांत पावसाचा जोर वाढेल, असा अंदाज वर्तविला आहे.