उद्योग अवतीभवती

कायनेटिक ग्रीन-अॅक्सिस बँकेत करार
पुणे, ता. ११ ः दुचाकी आणि तीनचाकी इलेक्ट्रिक वाहनांची निर्मिती करणारी देशातील आघाडीची कंपनी कायनेटिक ग्रीन एनर्जी अँड पॉवर सोल्यूशन्स लिमिटेडने ग्राहकांना वित्त पुरवठ्याचा पर्याय उपलब्ध करून देण्यासाठी अॅक्सिस बँकेशी धोरणात्मक भागीदारी करार केला. कायनेटिक ग्रीनचे सह-संस्थापक आणि संचालक रितेश मंत्री आणि ॲक्सिस बँकेचे प्रमुख वरिष्ठ उपाध्यक्ष (सप्लाय चेन फायनान्स) इरफान तांबोळी यांनी करारावर स्वाक्षरी केली. यानुसार ग्राहकांना वाहनाच्या ऑन-रोड किमतीवर १०० टक्क्यांपर्यंत वित्त पुरवठा मिळेल. परताव्यासाठी ४८ महिन्यांची मुदत असेल. ॲक्सिस बँकेच्या देशातील चार हजार पाचशे शाखा आणि कायनेटिक ग्रीनच्या २५ राज्यांतील ३०० वितरकांकडे योजनेचा लाभ मिळेल.
-----
ब्रिजस्टोनमध्ये महिला उमेदवारांना संधी
पुणे, ता. ११ ः ब्रिजस्टोन इंडियाने उत्पादनातील उच्चकौशल्य प्रशिक्षण उपक्रमांचा भाग म्हणून कंपनीच्या पुण्यातील उत्पादन प्रक्रियांमध्ये ९३ शिकाऊ महिला उमेदवारांचा समावेश केला. शॉप फ्लोअरवरील यंत्रसामग्री चालवणे तसेच दर्जानिश्चिती विभागांतील कामांचे प्रशिक्षण महिलांना दिले जात आहे. केंद्र सरकारच्या ‘नॅशनल अॅप्रेंटीसशीप प्रमोशन स्कीम’मध्ये या महिलांचा समावेश करण्यात आला आहे. त्यांच्या आरोग्यासाठी एक महिला डॉक्टरही तसेच महिला सुरक्षा रक्षक आणि पाळणाघर अशा सुविधा देण्यात आल्या आहेत. कामावरून उशिरा घरी परतणाऱ्या महिलांसाठी वाहतूक व्यवस्थाही असेल, अशी माहिती ब्रिजस्टोन इंडियाचे मुख्य मनुष्यबळ विकास अधिकारी अपूर्व चौबे यांनी दिली. कंपनीने केंद्र सरकारच्या योजनेतंर्गत पुणे व इंदूर येथील कारखान्यांत ५१७ महिला शिकाऊ उमेदवार नियुक्त केल्या आहेत.
-----
आयसीआयसीआयची शंभरावी शाखा सुरु
पुणे, ता. ११ ः आयसीआयसीआय बँकेने पुणे शहरातील शंभरावी शाखा बाणेर येथे नुकतीच सुरू केली. पॅनकार्ड क्लब रस्ता येथील शाखेत एटीएमकम कॅश रिसायकलर मशिन (सीआरएम) बसवण्यात आले आहे. त्यामुळे ग्राहकांना पैसे भरणे तसेच काढण्याची सेवा मिळेल. बँकेचे कार्यकारी संचालक राकेश झा यांनी शाखेचे उद्घाटन केले. या शाखेत ग्राहकांना बँकेच्या सर्व सुविधा मिळतील, असे त्यांनी सांगितले. या शाखेमध्ये टॅब बँकिंग सुविधा आहे. त्याअंतर्गत कर्मचारी टॅबच्या मदतीने ग्राहकाच्या घरी किमान शंभर प्रकारच्या सेवा देतील.
-----