वारकऱ्यांना पर्यावरणपूरक पत्रावळीतून अन्नदान

पुणे, ता. ९ ः आषाढी एकादशीनिमित्त दरवर्षी निघणारी पंढरपूर वारी म्हणजे वारकऱ्यांसाठी आनंदाची पर्वणीच. आधुनिक युगात वाढत्या नागरिकरणामुळे आणि वारीतील वाढत्या संख्येमुळे स्वच्छता विषयाच्या अनुषंगाने ‘निर्मल वारी, निसर्ग वारी, प्रदूषण मुक्त वारी’ अभियान सुरू आहे. ‘थं क्रिएटिव्ह’ या सामाजिक संस्थेच्या माध्यमातून यावर्षी प्लॅस्टिक थर्माकोल कचरामुक्त दिंडी अभियान २०२३ राबविणार आहे, अशी माहिती निसर्गवारी अभियानाचे प्रमुख प्रशांत अवचट यांनी दिली.
अभियानांतर्गत पर्यावरणपूरक पत्रावळीतून भोजन देऊन पर्यावरण संरक्षण आणि आरोग्याचे जतन करण्यासाठी संस्थेने पुढाकार घेतला आहे. त्यातून समाजाच्या हितासाठी पर्यावरण संरक्षण, निसर्ग संवर्धन, पाणी बचत, वारकऱ्यांचे आरोग्य, पत्रावळी वाटप ते संकलन रचना, कचरा मुक्ती सहज शक्य होईल. संपूर्ण वारी मार्गावर अशा स्वरूपाच्या पत्रावळींचा वापर करण्यासाठी संस्थेने पुढाकार घेतला आहे. त्यासाठी आळंदी, देहू येथील नोंदणीकृत दिंडींचे चालक, व्यवस्थापक आणि स्थानिक संस्थांशी संपर्क करून या अभियानासाठी प्रबोधनपर कार्यक्रमही ठेवले असल्याचे अवचट यांनी सांगितले.