‘लाडक्या बहिणीं’चा मतदानासाठी उत्साह

पुणे, ता. २० : विधानसभा निवडणुकीत राज्यात बुधवारी सर्वत्र मतदान होत असताना पुण्यात मतदानासाठी ‘लाडक्या बहिणीं’चा उत्साह दिसून आला. शहरातील आठही विधानसभा मतदारसंघांमध्ये महिला मतदारांनी उत्साहाने मतदान केले. आता त्यांच्या मतांची ‘ओवाळणी’ कोणाला मिळणार?, हे पाहणे उत्सुकतेचे ठरणार आहे.

महायुती सरकारच्या महत्त्वाकांक्षी ‘लाडकी बहीण’ योजनेच्या पार्श्वभूमीवर यंदा महिला मतदारांकडे सर्वच राजकीय पक्षांच्या कार्यकर्त्यांचे लक्ष होते. महिला मतदारांनी मोठ्या संख्येने मतदानासाठी बाहेर पडावे, यासाठी कार्यकर्त्यांनी जोरदार प्रयत्न केले होते. नोकरी आणि व्यवसायासाठी बाहेर पडणाऱ्या अनेक महिलांनी सकाळी लवकरच मतदान केंद्र गाठत आपला मतदानाचा हक्क बजावला. गृहिणींनी मात्र घरातील कामे संपवून दुपारी मतदानासाठी धाव घेतली. दुपारी तीननंतर अनेक मतदान केंद्रांवर महिला मतदारांच्या रांगा लागल्या होत्या. सायंकाळी उशिरापर्यंत त्या कायम होत्या.

‘जो महिलांचा विचार करेल, त्यालाच आम्ही मत देणार. महागाई वाढलेली असताना महिलांचा विचार करून जर कोणी आमच्या खात्यात पैसे जमा करत असेल, तर त्या पक्षाला आम्ही मत देऊ’, असे थेट मत बेधडकपणे व्यक्त केले. तर दुसरीकडे ‘खात्यात पैसे जमा करून काय फायदा, आमच्या आणि घरातील पोरांच्या हाताला काम पाहिजे. महागाई कमी करणाऱ्यांना आमचा पाठिंबा असेल’, असेही मत काही महिलांनी नाव न सांगण्याच्या अटीवर व्यक्त केले.

पाच वर्षांतून एकदा येणाऱ्या निवडणुकीत मतदान केलेच पाहिजे; तरच आपल्याला लोकप्रतिनिधींना जाब विचारण्याचा अधिकार राहतो. जी व्यक्ती आमच्या समस्या सोडविण्यासाठी धावून येते आणि महिलांच्या समस्यांचा विचार करते, त्यांनाच आम्ही मत देणार.
- संगीता बोत्रे, जनता वसाहत

मी प्रत्येक निवडणुकीत आवर्जून मतदान करते. लोकशाहीने दिलेला हक्क आपण बजावलाच पाहिजे. महिलांचा विचार करणाऱ्या उमेदवारांना आमचे प्राधान्य असेल.
- सुनीता पवार, पर्वती दर्शन

प्रत्येक निवडणुकीत मतदान करण्याचा माझा प्रयत्न असतो. जागरूक नागरिकांनी मतदान करायलाच हवे. मी माझ्या कुटुंबीयांसह दुपारी दोन वाजता मतदान केले.
- मनीषा पाष्टे, पौड फाटा