सेक्स एस्कॉर्टच्या नावावर होतेय तरुणांची फसवणूक

पुणे, ता. १७ : सायबर चोरट्यांनी तरुणाचा फोटो मॉर्फ करून त्याला टेलिग्रामवर सात-आठ अश्‍लील फोटो पाठविले. त्यानंतर ते फोटो आई-वडिलांना पाठविण्याची धमकी दिली. सेक्स एस्कॉर्टची सेवा वापरल्याचे सांगून तरुणाकडून ७८ हजार रुपये उकळले. अशा प्रकारच्या घटनांवरून सेक्स एस्कॉर्टच्या माध्यमातून तरुणांना लुबाडण्याचा प्रकार सुरू असल्याचे समोर आले आहे.
विमाननगर परिसरातील म्हाडा कॉलनीतील १९ वर्षीय तरुणाशी दोघांनी मोबाईलवर संपर्क साधला. पंकज भदौरिया आणि जगदीश नावाच्या आरोपींनी या तरुणाला त्याचे मॉर्फ केलेले अश्‍लील फोटो टेलिग्रामवर पाठविले. ते फोटो त्याच्या आई-वडिलांना पाठविण्याची धमकी दिली. त्यानंतर तरुणाच्या व्हॉटसअॅपवर क्यूआर कोड पाठवला. आरोपींनी तरुणाला सेक्स एस्कॉर्टची सेवा घेतल्याचे सांगितले. ती सेवा रद्द करायची असेल तर पैसे द्यावे लागतील, असे धमकावले. त्यामुळे तरुणाने घाबरून ७८ हजार रुपये आरोपींना पाठविले. या प्रकरणी विमानतळ पोलिस ठाण्यात दोघांविरुद्ध गुन्हा दाखल केला आहे.