Uddhav Thackeray : अयोध्येला न जाणाऱ्या ठाकरेंचा नास्तिकपणा उघड - चंद्रशेखर बावनकुळे

पुणे : ‘‘उद्धव ठाकरे यांनी यापूर्वी सावरकरांचाही अपमान केला आहे, त्यांना अयोध्येतील श्री राम मंदिर प्राणप्रतिष्ठेचे निमंत्रण देण्यात आले. त्यानंतरही ते अयोध्येला गेले नाहीत, मतांच्या राजकारणासाठी ते किती खाली गेले आहेत, हे स्पष्ट होत आहे.

त्यातूनच उद्धव ठाकरे यांचा नास्तिकपणाही पुढे आला आहे.’’ अशा शब्दांत भाजपचे प्रदेशाध्यक्ष चंद्रशेखर बावनकुळे यांनी मंगळवारी उद्धव ठाकरेंवर निशाणा साधला.

(Atheism of Uddhav Thackeray not going to Ayodhya exposed Chandrashekhar Bawankule)

‘अयोध्या आस्था रेल्वे’ ही विशेष रेल्वे बावनकुळे यांच्या उपस्थितीत मंगळवारी अयोध्येला रवाना झाली. या वेळी बावनकुळे यांनी पत्रकारांशी संवाद साधला. बावनकुळे म्हणाले, ‘‘काँग्रेसने २००८ व २०११ मध्ये अयोध्येतील रामाचा जन्म आणि रामसेतू हे दोन्ही घटना काल्पनिक असल्याचे सर्वोच्च न्यायालयात सांगितले होते.

पंतप्रधान नरेंद्र मोदी हे सत्तेवर आले, त्यानंतर झालेल्या उत्खननानंतर अयोध्येतील रामाचा जन्म व रामसेतू या दोन्ही घटना काल्पनिक नसून सत्य असल्याचे पुरावे न्यायालयात सादर करण्यात केले. या पुराव्यांच्या आधारावर न्यायालयाने श्री राम मंदिरासाठीचा निकाल दिला.’’

अयोध्या येथे सर्वसामान्य भाविकांना दर्शनासाठी जाऊ द्यावे, भाजपचे पदाधिकारी, मंत्री तेथे गेल्यास सर्वसामान्य भाविकांना त्रास होऊ शकतो, त्यामुळे पदाधिकारी, मंत्र्यांनी तुर्तास जाऊ नये, अशा सूचना पंतप्रधानांनी दिल्या आहेत. त्यामुळे आम्हाला आत्ता अयोध्येला जाता येणार नाही. मात्र आमचा नमस्कार तुम्ही श्रीरामांच्या चरणी अर्पण करा, असे भावनिक आवाहनही बावनकुळे यांनी केले.

कोण गुन्हेगार आहे, हे कसे ठरणार ?

आमच्यासमवेत गुन्हेगार असल्याचे फोटो विरोधक सादर करतात, पण आमच्याकडेही हजारो फोटो आहेत. मुळात आपण सार्वजनिक कार्यक्रमात असताना आपल्याबाजूला कोण येऊन फोटो काढेल, ते व्हायरल करेल, यावर आम्ही कसे लक्ष ठेवणार. कोण गुन्हेगार आहे, हे कसे ठरणार? त्यामुळे संबंधित आरोप हे तत्थहीन असल्याचेही बावनकुळे यांनी स्पष्ट केले.