Narendra Dabholkar Murder Case: ‘हिंदू दहशतवादा’चे कुभांड रचणाऱ्यांचा पराभव,सनातन संस्थचे प्रवक्ते अभय वर्तक यांचा दावा

पुणे, ता. १० ः डॉ. नरेंद्र दाभोलकर हत्येप्रकरणी सनातन संस्थेचे साधक निर्दोष असल्याचा निकाल ‘सीबीआय’च्या विशेष न्यायालयाने दिला. डॉ. दाभोलकर हत्याप्रकरणात हिंदू दहशतवादाचा संबंध असल्याचे षडयंत्र पुरोगामी चळवळ व शहरी नक्षलवाद्यांनी रचले होते. मात्र या निकालावरून त्यांचे षडयंत्र विफल झाले. हा निकाल म्हणजे हिंदू दहशतवाद्यांचे कुभांड रचणाऱ्यांचा पराभव असल्याचे सनातन संस्थचे प्रवक्ते अभय वर्तक यांनी सांगितले.

पुण्याच्या सीबीआय विशेष न्यायालयाचा डॉ. नरेंद्र दाभोलकर खून प्रकरणाचा निकाल शुक्रवारी लागला. या विषयी सनातन संस्थेची बाजू मांडण्यासाठी पत्रकार परिषदेचे आयोजन केले होते. अभय वर्तक म्हणाले, ‘‘न्यायालयाने विक्रम भावे, डॉ. वीरेंद्र तावडे व ॲड. संजीव पुनाळेकर यांना निर्दोष सिद्ध केले तर सचिन अंदुरे व शरद कळसकर या दोघांना दोषी असल्याचे निकालपत्रात म्हटले आहे. सचिन अंदुरे व शरद कळसकर या दोघांसाठी या प्रकरणातील अधिवक्ते हे मुंबई उच्च न्यायालयात या निकाला विरोधात दाद मागणार आहेत. हे दोघे सनातन संस्थेशी निगडित नाहीत’’. पत्रकार परिषदेत सुनील घनवट उपस्थित होते.

पत्रकार परिषदेतील महत्त्वाचे मुद्दे
- ११ वर्षांच्या लढ्यानंतर अखेर न्याय मिळाला
- डॉ. हमीद दाभोलकर व मुक्ता दाभोलकर यांच्या फाजील आत्मविश्वासाचा हा पराभव
- सुरवातीपासूनच या प्रकरणाचा तपास संशयास्पद
- डॉ. दाभोलकर यांच्या हत्येनंतर लगेच हिंदू संस्थेचा यात हात असू शकतो असे वक्तव्य माजी मुख्यमंत्री पृथ्वीराज चव्हाण यांनी केले. त्यामुळे तपासाची दिशा बदलली
- गोव्यातून अटक केलेले मंगेश चौधरी व रसूल अन्सारी हे कबुलीजबाबात आम्हीच डॉ. दाभोलकर यांना मारले असल्याचे सांगितले. मात्र पोलिसांनी तो जवाबच बदलला
- या प्रकरणात १६०० परिवारांची व बँक खात्यांची चौकशी