Dahihandi Pune Traffic: पुणेकरांनो लक्ष द्या, दहीहंडीनिमित्त होणार वाहतुकीत बदल, कोणते रस्ते बंद, काय आहेत पर्यायी मार्ग?

पुणे, ता. २५ : दहीहंडीनिमित्त होणारी गर्दी टाळण्यासाठी शहराच्या मध्य भागांतील वाहतुकीत बदल करण्यात येणार आहे. मंगळवारी (ता. २७) सायंकाळनंतर छत्रपती शिवाजी रस्ता, लक्ष्मी रस्ता, बाजीराव रस्ता, टिळक रस्त्यावरील वाहतूक व्यवस्थेत बदल असणार आहेत. या भागांतील वाहतूक पर्यायी मार्गाने वळविण्यात येणार आहे.

दहीहंडीनिमित्त छत्रपती शिवाजी रस्ता, महात्मा फुले मंडई, हुतात्मा बाबू गेणू चौक, अप्पा बळवंत चौक, टिळक रस्त्यावरील साहित्य परिषद चौक, नवी पेठेत मोठी गर्दी होते. मंगळवारी सायंकाळी पाचनंतर दहीहंडी फुटेपर्यंत या भागांतील वाहतूक व्यवस्थेत बदल करण्यात येणार आहेत. गर्दी वाढल्यानंतर छत्रपती शिवाजी रस्ता, टिळक रस्ता, लक्ष्मी रस्ता, बाजीराव रस्ता वाहतुकीस बंद ठेवण्यात येणार आहे. या भागांतील वाहतूक पर्यायी मार्गाने वळविण्यात येणार आहे, अशी माहिती वाहतूक शाखेचे पोलिस उपायुक्त अमोल झेंडे यांनी दिली.

छत्रपती शिवाजी रस्त्याने स्वारगेटकडे जाणाऱ्या वाहनांनी काय करावे ?

छत्रपती शिवाजी रस्त्याने स्वारगेट कडे जाणाऱ्यांनी स. गो. बर्वे चौकातून जंगली महाराज रस्ता, खंडुजीबाबा चौकमार्गे इच्छितस्थळी जावे. टिळक रस्त्यावरील पूरम चौकातून बाजीराव रस्त्याने शिवाजीनगरकडे जाणाऱ्या वाहनांनी टिळक रस्तामार्गे इच्छितस्थळी जावे.

स. गो. बर्वे चौकातून महापालिका भवनाकडे जाणाऱ्या वाहनांनी काय करावे ?

स. गो. बर्वे चौकातून महापालिका भवनाकडे जाणाऱ्या वाहनांनी स. गो. बर्वे चौकातून जंगली महाराज रस्ता, झाशीची राणी चौकमार्गे महापालिका भवनाकडे जावे.

बुधवार चौकातून अप्पा बळवंत चौकाकडे जाणारी वाहतूक एकेरी

अप्पा बळवंत चौकातून बुधवार चौकाकडे जाणाऱ्या वाहनांना प्रवेश बंद करण्यात येणार आहे. अप्पा बळवंत चौकातून बाजीराव रस्त्याने वाहनचालकांनी इच्छितस्थळी जावे.

बंद असणारे रस्ते

- मंडईतील रामेश्वर चौक ते शनिपार चौक
- लक्ष्मी रस्त्यावरील सोन्या मारुती चौक ते सेवा सदन चौक
- छत्रपती शिवाजी रस्त्यावरील लालमहाल चौक ते गोटीराम भय्या चौक, मंडई
- दारूवाला पूल चौक ते गणेश रस्ता लाल महाल चौक