Pune Crime: पार्किंगचा वाद भोवला..! निवृत्त जवानाने गोळी झाडल्याने एकाचा मृत्यू

पुणे/विश्रांतवाडी, ता. १ : पार्किंगच्या वादातून निवृत्त लष्करी जवानाने केलेल्या गोळीबारात टेम्पोचालकाचा बळी गेला. येरवडा परिसरातील अशोकनगरमधील श्रीराम मित्र मंडळाजवळ गुरुवारी (ता. ३१) रात्री साडेअकरा वाजण्याच्या सुमारास हा प्रकार घडला.

शहानवाज मुलाणी (वय ३५) असे मृताचे नाव आहे. याबाबत त्यांची पत्नी दिलशाद (वय ३३, (रा. येरवडा) यांनी फिर्याद दिली. त्यावरून पोलिसांनी निवृत्त जवान श्रीकांत श्यामराव पाटील (वय ४५, रा. श्रीराम मित्र मंडळ) याच्यावर गुन्हा दाखल केला. त्याला याला अटक करण्यात आली. मुलाणी आणि पाटील शेजारी राहतात.

पार्किंगवरून झालेल्या वादाचा राग मनात धरून पाटीलने बंदुकीतून झाडलेली गोळी लागून शहानवाज याच्या डोक्यात लागली. ते गंभीर जखमी झाले. त्यांना ससून रुग्णालयात दाखल करण्यात आले, मात्र उपचारादरम्यान त्यांचा मृत्यू झाला. याबाबत माहिती मिळताच अतिरिक्त आयुक्त मनोज पाटील आणि पोलिस उपायुक्त हिम्मत जाधव घटनास्थळी दाखल झाले. पुढील तपास वरिष्ठ पोलिस निरीक्षक रवींद्र शेळके करीत आहेत.