सातारा रस्त्यांवरील टोल होणार रद्द'; नितीन गडकरी

कात्रज - सातारा रस्त्यांवरील टोल रद्द (टर्मिनेट) करण्यात येणार असल्याची घोषणा केंद्रीय वाहतूक मंत्री नितीन गडकरी यांनी आज (ता. २४) केली. कात्रज चौकातील सहा पदरी उड्डाणपुलाचे भूमिपूजन गडकरी यांच्या हस्ते झाले, त्यावेळी ते बोलत होते.

गडकरी म्हणाले, 'कात्रज उड्डाण पुलाच्या निमित्ताने कात्रज चौकातील वाहतूक कोंडीवर उपाय निघणार आहे. पुणे सातारा रस्ता हा अडचणीचा झाला होता. या मार्गावर अनेक अपघात होत होते. या रस्त्यावरही मार्ग निघाला असून रस्त्याचा टोल टर्मीनेट करण्यात आला आहे. राष्ट्रीय महामार्गाकडून त्यांसाठी ५० कोटी रुपये देऊन येत्या डिसेंबरपर्यंत या रस्त्याचे काम मार्गी लागू शकते. त्याचबरोबर, एका उत्तम संस्थेकडून अभ्यास चालू असून हा रस्ता ऊत्तम होईल, असा विश्वास गडकरींनी यावेळी व्यक्त केला.

यावेळी कार्यक्रमाला विधान परिषदेच्या उपसभापती डॉ. नीलम गोर्हे, भाजपचे प्रदेशाध्यक्ष चंद्रकांत पाटील, आमदार माधुरी मिसाळ, भीमराव तापकीर, मुक्ता टिळक, महापौर मुरलीधर मोहोळ, माजी आमदार योगेश टिळेकर, सभागृहनेते गणेश बीडकर, स्थायी समिती अध्यक्ष हेमंत रासने, विभागीय आयुक्त सौरभ राव, महापालिका आयुक्त विक्रमकुमार आदी उपस्थित होते.