Pune Crime : टोल नाक्याच्या कर्मचाऱ्यांची STचालकाला मारहाण; खेड शिवापूरमधील गंभीर प्रकार

नसरापूर : खेड शिवापूर (ता. हवेली) येथील टोलनाक्यावर गुरुवारी (ता. १९) सायंकाळी एसटीचालकास १० ते १५ टोल कर्मचाऱ्यांनी अमानुष मारहाण केली. याबाबत एसटीचालक प्रवीण भगवान नांगरे (वय ३४, रा. गुहागर, जि. रत्नागिरी; मूळगाव आटपाडी, जि. सांगली) यांनी तक्रार दाखल केली.

त्यानुसार, ते गुरुवारी (ता. १९) एसटी बस (क्र. एमएच २० बीएल १२४८) चालवत गुहागरवरून स्वारगेटला येत होते. त्या वेळी सायंकाळी साडेसहा वाजता त्यांच्या बसला शिवापूर टोलनाक्यावर एका ट्रकचालकाने कट मारला व तो ट्रक टोलनाका पार करून पुढे वजनकाट्यावर थांबला.

त्या वेळी नांगरे यांनी एसटी बाजूला लावून ट्रकचालकास, ‘तू एसटीला कट का मारला?’ अशी विचारणा केली. त्या वेळी तेथे टोलनाक्यावर काम करणारा कर्मचारी विशाल जाधव याने, ‘तू तरी कुठे एसटी नीट चालवतो.

एसटी ड्रायवरांना लय माज असतो,’ असे म्हणून शिवीगाळ व दमदाटी करत मारहाण सुरू केली. हे पाहून टोलवरील इतर कर्मचाऱ्यांनी तेथे येऊन, त्यांनीदेखील मारहाण करण्यास सुरुवात केली. मारहाण करणारे साधारण दहा ते पंधरा जण होते. त्यामध्ये चालक नांगरे जबर जखमी झाले. तसेच, सोडवण्यासाठी आलेल्या एसटीच्या वाहकालादेखील मारहाण केली.

या दरम्यान एसटीमधील प्रवाशांनी व इतरांनी फोनवरून जवळच्या पोलिस चौकीला माहिती दिली. मात्र, घटना घडून दोन तास झाले तरी पोलिस टोलनाक्यावर फिरकले नाहीत. उलट, ‘तुम्हीच एसटी घेऊन शिवापूर चौकीला या,’ असे सांगण्यात आले. त्यामुळे ते शिवापूर पोलिस चौकीला गेले.

दरम्यान, टोलनाक्यावरील गुंडांना येथील पोलिस पाठीशी घालत असल्याचे निदर्शनास आले. याबाबत मी आमच्या एसटी कामगार युनियनकडे दाद मागणार आहे, असे एसटी चालक प्रवीण भगवान नांगरे यांनी सांगितले.