तौक्ते’चा पुण्यावरील प्रभाव अखेर कमी

पुणे : तौक्ते चक्रीवादळाच्या प्रभावामुळे पुण्यात काही दिवसांपासून जोरदार वारे आणि पावसाचे सावट कायम होते. मात्र, वादळ गुजरातला पोचल्यानंतर आता प्रभाव कमी झाल्याचे दिसून आले. तर सोमवारी (ता. १७) रात्रीनंतर शहर आणि परिसरात पावसाने काहीशी विश्रांती घेतली होती. मंगळवारी ढगाळ वातावरण होते मात्र पावसाची नोंद झाली नाही. तर बुधवारी (ता. १९) शहरात दुपारनंतर ढगाळ वातावरण तसेच मेघगर्जनेसह हलक्या सरींची अपेक्षा हवामान विभागाने व्यक्त केली आहे.

मंगळवारी शहरातील हवामान ढगाळ होते. तर पुढील पाच दिवस म्हणजेच येत्या सोमवारपर्यंत (ता. २४) शहरात सकाळी आकाश मुख्यतः निरभ्र असेल. मात्र काही प्रमाणात दुपारी किंवा संध्याकाळनंतर अंशतः ढगाळ वातावरणाची शक्यता हवामान विभागाने वर्तवली आहे.(Touktea s influence on Pune has finally diminished)

राज्यात मंगळवारी काही ठिकाणी अतिवृष्टी तर काही ठिकाणी मध्यम स्वरूपाच्या पावसाची नोंद झाली होती. तर मध्य महाराष्ट्रासह विदर्भातील बऱ्याच ठिकाणी कमाल तापमानात सरासरीच्या तुलनेत उल्लेखनीय घट नोंदली गेली होती. तौक्तेची तीव्रता कमी होत असल्यामुळे याचा परिणाम राज्यावरही दिसून येत आहे. पुढील चार दिवस राज्यातील तुरळक ठिकाणी पावसाचा अंदाज देण्यात आला आहे. तर मराठवाड्यात गुरुवारपासून (ता. २०) आणि विदर्भात शुक्रवारपासून (ता. २१) हवामान कोरडे राहणार असल्याचेही हवामान खात्याने नमूद केले.

पुण्याच्या बातम्या वाचण्यासाठी क्लिक करा