लसीकरणाच्या आडून होतेय सायबर फसवणूक; कशी ते वाचा

पुणे - ‘मी केंद्र सरकारच्या आरोग्य विभागातून बोलतोय... कोरोना लशीसाठी तुमची नावनोंदणी करायची आहे... त्यासाठी तुमचा आधार कार्ड क्रमांक, इतर कागदपत्रे व तुमच्या मोबाईलवर येणारा ओटीपी सांगा,’’ असा फोन, ई-मेल किंवा एखादा मेसेज तुम्हाला आला, तर त्याला प्रतिसाद देऊ नका. कारण, सायबर गुन्हेगारांकडून तुम्हाला लक्ष्य करून फसवणूक सुरू आहे. शहरात असे प्रकार घडून फसवणुका वाढल्याने अशा प्रलोभनांना बळी पडू नका, असे आवाहन पुणे पोलिसांनी केले आहे.

सायबर गुन्हेगारांकडून नागरिकांची आर्थिक फसवणूक करण्यासाठी वेगवेगळे फंडे वापरले जात आहेत. यापूर्वी जनधन योजना, फास्टॅग किंवा अन्य सरकारी योजनांच्या नावाखाली नागरिकांना फोन, ईमेल किंवा मेसेज पाठवून फसवणूक करण्याचे प्रकार सायबर गुन्हेगारांकडून सातत्याने सुरू होते. मात्र आता त्यांनी फसवणुकीचा फंडा बदलला आहे. ज्येष्ठ नागरिक, महिलांनो कोरोना लशीच्या नावनोंदणीच्या नावाखाली तुमची फसवणूक होऊ शकते, त्यामुळे दक्ष राहा.

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

गेल्या काही दिवसांत शहरात काही नागरिकांची कोरोना लशीच्या नावाखाली फसवणूक झाली आहे. काहींना आर्थिक फटकादेखील बसला आहे. मात्र नागरिकांकडून अद्याप पोलिसात तक्रार दाखल झाली नसल्याचे सायबर पोलिसांनी सांगितले. आरोग्य विभागानेही अशा प्रकारे कुठल्याही फसवणुकीला नागरिकांनी बळी पडू नये, तसेच आरोग्य विभागाशी संपर्क साधावा, असे आवाहन केले आहे.

खळबळजनक! राष्ट्रवादीच्या नगरसेवकच्या हत्येचा कट; येरवड्यात शिक्षा भोगणाऱ्या गुंडाने घेतली सुपारी!

कोरोना लशीसंदर्भात नागरिकांना फोन येत आहेत, अशी चर्चा आहे. मात्र नागरिकांची फसवणूक झाल्याबाबत आमच्याकडे अद्याप एकही तक्रार आलेली नाही. नागरिकांनी दक्षता बाळगत आपली वैयक्तिक आणि गोपनीय माहिती कोणालाही देऊ नये.
- राजकुमार वाघचौरे, वरीष्ठ पोलिस निरीक्षक, सायबर पोलिस ठाणे

पुणेकरांनो, 'थर्टी फर्स्ट'ला बाहेर पडताय? जाणून घ्या वाहतुकीतील बदल

सायबर गुन्हेगार बॅंक, क्रेडिट कार्ड कंपनीतून बोलत असल्याचे सांगून फसवणूक करत होते. आता तर सरकारी कार्यालयातून बोलत असल्याचे सांगून कोरोना लशीसाठी नागरिकांच्या नावांची नोंदणी करण्याचा बहाणा करून फसविले जात आहे. काही जणांची आर्थिक फसवणूक झाली आहे; मात्र ते भीतीपोटी पोलिसात तक्रार दाखल करत नाहीत. 
- डॉ. दीपक शिकारपूर, संगणकतज्ज्ञ

सत्यजित तांबेचे संधीसाधू राजकारण संपूर्ण राज्याला माहित आहे - अंकिता पाटील

लसीकरणाची प्रक्रिया चार टप्प्यांत होणार आहे. त्यात आरोग्य कर्मचारी, ५० वर्षे वयापुढील नागरिक व त्यानंतर सर्वसामान्यांना लस दिली जाणार आहे. त्यासंदर्भात ॲपवर नोंदणी केली जाते. अशा प्रकारे फोनद्वारे कोणतीही नोंदणी केली जात नाही, त्यामुळे नागरिकांनी आमिषांना बळी पडू नये. 
- डॉ. वैशाली जाधव, सहायक आरोग्य अधिकारी, महापालिका

काय घ्याल काळजी? 
1) कोणालाही बॅंक खाते, आधार कार्ड, डेबिट व क्रेडिट कार्डची माहिती देऊ नका
2) डेबिट कार्डवरील सीव्हीव्ही, ओटीपी, पिनही कोणाला सांगू नका
3) संशयास्पद व्यक्तींचे फोन घेणे शक्‍यतो टाळा
4) संशयास्पद मोबाईल क्रमांक ब्लॉक करून त्याविषयी पोलिसांना माहिती द्या
5) कोरोना तपासणी किंवा लशीसंबंधी माहितीसाठी महापालिकेच्या आरोग्य विभागाकडे संपर्क साधा

Edited By - Prashant Patil