पुणे - वैशाली हॉटेलचे मालक जगन्नाथ शेट्टी यांचे निधन

पुणे - पुण्यातील प्रसिद्ध वैशाली हॉटेलचे (Vaishali Hotel) मालक जगन्नाथ शेट्टी (Jagannath Shetty) यांचे निधन झाले. वयाच्या ८९ व्या वर्षी त्यांनी अखेरचा श्वास घेतला. रविवारी सकाळी ८ च्या सुमारास त्यांची प्राणज्योत मालवली. जगन्नाथ शेट्टी यांचे पार्थिव अंत्यदर्शनासाठी दुपारी वैशाली हॉटेल इथे ठेवण्यात येणार आहे. तर सायंकाळी ५ वाजता वैकुंठ स्मशानभुमीत अंत्यसंस्कार करण्यात येणार आहेत.

पुण्यात फर्ग्युसन रोडवर असलेलं वैशाली हॉटेल प्रसिद्ध आहे. जगन्नाथ शेट्टी यांचा जन्म १९३२ मध्ये झाला. वयाच्या १३ व्या वर्षी ते काकांकडे आले, त्यानंतर वयाच्या १७ व्या वर्षी जगन्नाथ शेट्टी पुण्यात आले. १९५१ मध्ये कॅफे मद्रास हे रेस्टॉरंटही सुरु केले होते. त्यानंतर मद्रास हेल्थ होम, वैशाली हॉटेल सुरु केले होते.

वैशाली हॉटेलला पुणे महापालिकेकडून क्लिनेस्ट किचन पुरस्कारही मिळाला आहे. तसंच २००० मध्ये पुण्यातील त्रिदल संस्थेनं पुण्यभूषण पुरस्कारानेही गौरव केला होता. याशिवाय चिमणलाल गोविंददास मेमोरिअल ट्रस्टने जगन्नाथ शेट्टींना उद्यम गौरव पुरस्काराने सन्मानित केले होते. जगन्नाथ शेट्टी यांनी कोरोनाच्या संकटात दातृत्वाचा हातही दिला होता. त्यांनी मुख्यमंत्री सहाय्यता निधीत १ कोटी रुपये दिले होते.