विश्वासार्हतेमुळेच विद्याधर अनास्कर राज्य बॅंकेवर : अजित पवार

पुणे : ‘‘राज्यात देवेंद्र फडणवीस यांचे सरकार होते त्यावेळी विद्याधर अनास्कर हे महाराष्ट्र राज्य सहकारी बॅंकेवर प्रशासक होते. त्यानंतर उद्धव ठाकरे मुख्यमंत्री झाले तरी तेच प्रशासक आहेत. राष्ट्रवादी काँग्रेसचे ज्येष्ठ नेते शरद पवार यांच्याशीही त्यांचे चांगले संबंध आहेत. एवढी विश्वासार्हता एखाद्या व्यक्तीवर असली पाहिजे,’’ अशा शब्दांत उपमुख्यमंत्री अजित पवार यांनी अनास्कर यांचे कौतुक केले.

अनास्कर यांची राज्य सहकार परिषदेच्या अध्यक्षपदी नुकतीच निवड झाली. यानिमित्त पुणे जिल्हा नागरी सहकारी बॅंक्स असोसिएशनच्या वतीने बालगंधर्व रंगमंदिरात उपमुख्यमंत्री पवार यांच्या हस्ते त्यांचा सत्कार करण्यात आला. या कार्यक्रमात अनास्कर यांनी ‘राजकारणात सहकार असला पाहिजे, परंतु सहकारात राजकारण नको’, अशी भूमिका मांडली. हाच धागा पकडत उपमुख्यमंत्री पवार म्हणाले, ‘‘राज्य सहकारी बॅंक चुकीच्या पद्धतीने चालली आहे, त्याठिकाणी भ्रष्टाचार झाल्याचे वातावरण विरोधकांकडून तयार करण्यात आले. साखर कारखाने कमी दराने लिलाव करण्यात आल्याचे आरोप झाले. या संदर्भात सहकार विभाग, सीआयडी, सेवानिवृत्त न्यायाधीशामार्फत चौकशी झाली. परंतु त्यात काहीही तथ्य आढळले नाही.’’

राज्य सरकारने राज्य बॅंकेचे प्रशासक म्हणून अनास्कर यांना नेमले आहे. वास्तविक राज्य बॅंकेची निवडणूक आम्ही लावू शकतो. परंतु ३१ मार्चअखेर राज्य बॅंकेला चौदाशे कोटींचा ढोबळ नफा आणि सहाशे कोटी रुपयांचा निव्वळ नफा झाला आहे. राज्य बॅंकेत अनास्कर यांनी बारकाईने लक्ष घातले आहे, असे त्यांनी नमूद केले.

‘‘राजकारणात सहकार असला पाहिजे, परंतु सहकारात राजकारण नको, हे अनास्कर यांनी बरोबर उचलले आहे. कोणाचेही सरकार असले तरी राज्य बॅंकेवर ते चांगल्या प्रकारे काम करीत आहेत. कधी आमच्याकडे कर्जाच्या मागणीसाठी शिष्टमंडळ येतात. परंतु कर्ज देताना रिझर्व्ह बॅंक, सहकार विभाग, नाबार्डचे काय निकष आहेत, हे तपासावे लागतात. कारण उद्या पुन्हा काय घडले तर कायदे किती कठोर आहेत, हे सर्वांनाच माहीत आहे. मी राज्य बॅंकेचे एखादे काम सांगितले आणि ते योग्य नसेल तरी माझेही ऐकायचे नाही, असे मी अनास्कर यांना सांगितले आहे,’’ असे सांगत पवार यांनी अनास्कर यांच्यावर दृढ विश्वास व्यक्त केला.