Vitthal Rukmini Mandir : विठ्ठल रुक्मीणी मंदिर समितीच्या सीईओ पदी धामणीच्या राजेंद्र शेळके यांची निवड

Vitthal Rukmini Mandir - धामणी ता. आंबेगाव येथील सर्वसामान्य शेतकरी कुटुंबातील राजेंद्र गणपत शेळके यांची श्रीक्षेत्र पंढरपुर येथील श्री. विठ्ठल रुक्मीणी मंदिर समितीच्या मुख्य कार्यकारी अधिकारी (सीईओ) पदी नियुक्ती झाली आहे.

राजेंद्र शेळके यांची सुरवातीला महाराष्ट्र लोकसेवा आयोगाच्या परीक्षेच्या माध्यमातून पोलीस उपनिरीक्षक पदी निवड झाली होती. पोलीस उपनिरीक्षक पदाच्या प्रशिक्षण काळात स्वोर्ड ऑफ ऑनर, स्वोर्ड ऑफ बॅटन, बेस्ट स्टुडंट, ऑल राऊंड स्टुडंट, हि बक्षिसे मिळवत त्यांनी अव्वल क्रमांक पटकाविला होता.

प्रशिक्षण काळात शेवटच्या पंधरा दिवसात त्यांना परेड कामांडर म्हणून काम करण्याची संधी मिळाली होती तत्कालीन गृहमंत्री छगन भुजबळ यांच्या हस्ते मानाची तलवार देऊन गौरव झाला होता.

पोलीस उपनिरीक्षक पदी कार्यरत असतानाही त्यांनी स्पर्धा तयारी सुरूच ठेवली होती नंतर त्यांची तहसीलदार पदी निवड झाली बार्शी, कराड, तासगाव, सोलापूर, पुणे जिल्हाधिकारी कार्यालय या ठिकाणी तहसीलदार म्हणून काम पाहिल्यानंतर त्यांची धर्माबाद (नांदेड) येथे प्रांतअधिकारी म्हणून निवड झाली आता त्यांची श्रीक्षेत्र पंढरपुर येथील श्री. रुक्मीणी मंदिर समितीच्या मुख्य कार्यकारी अधिकारी (सीईओ) पदी नियुक्ती झाली आहे.

आज सोमवारी त्यांनी पदभार स्वीकारला आहे. त्यांच्या निवडीने आंबेगाव तालुक्याच्या पूर्व भागातील लोणी- धामणी परिसरातील नागरिकांनी आनंद व्यक्त केला आहे. माजी पंचायत समिती सदस्य रविंद्र करंजखेले, धामणीचे माजी सरपंच सागर जाधव,

खडकवाडीचे माजी सरपंच अनिल डोके व ग्रामपंचायत सदस्य अक्षय विधाटे यांनी त्यांचे अभिनंदन केले आहे. संपूर्ण राज्याचे श्रद्धास्थान असलेल्या श्रीक्षेत्र पंढरपुर येथील श्री.विठ्ठल रुक्मीणी मंदिर येथे आषाढी एकादशीच्या तोंडावर माझी नियुक्ती होऊन काम करण्याची संधी मिळाल्याने हे मी माझे भाग्य समजतो अशी प्रतिक्रिया राजेंद्र शेळके यांनी व्यक्त केली.