Chandrakant Patil: "बारामती लोकसभा जिंकायची आहे"; पुणे पालकमंत्रीपद गमावल्यानंतर चंद्रकांत पाटलांचं मोठं विधान

Chandrakant Patil: उच्च आणि तंत्र शिक्षणमंत्री स्वतःबद्दल चंद्रकांत पाटील यांनी मोठं वक्तव्य केलं आहे. पुण्याचे पालकमंत्री पद सोडणे म्हणजे मोठ्या कामासाठी केलेली छोटी तडजोड आहे, असे चंद्रकांत पाटील म्हणाले. यावेळी त्यांनी बारामती लोकसभा जिंकण्याबद्दल वक्तव्य केले. त्यामुळे राजकीय वर्तुळात चर्चेला उधाण आलं आहे. बारामती लोकसभा मतदार संघाच्या आढावा बैठकीत ते बोलत होते.

चंद्रकांत पाटील म्हणाले, आपल्याला यंदा बारामती लोकसभा जिंकायची आहे. आता जिंकलो नाहीत तर कधीच जिंकणार नाही. त्यासाठी पुण्याचे पालकमंत्री पद अजित पवार यांच्याकडे जाणे महत्वाचे आहे. (Latest Pune News)

चंद्रकांत पाटील म्हणाले, "मी पालकमंत्री नाही हे एका मोठ्या उद्दीष्टासाठी केलेली छोटी तडजोड आहे. आपण हे ठरवायला पाहिजे. की जर देशामध्ये तिसऱ्यांना नरेंद्र मोदी पंतप्रधान व्हायचे असतील. तर एक एक जागा महत्वाची आहे. महाराष्ट्रातील ४८ जागा महत्वाच्या आहेत. त्यासाठी केंद्रीय नेतृत्वाने काही विचार केला आहे. त्या विचाराचा आपण सन्मान केला पाहिजे."

"महाविजय २०२४ ची तयारी करताना. बाकीच्या जागा जिंकता येतील पण आपल्याला बारामती विजयी करायची आहे", असे चंद्रकांत पाटील म्हणाले. एबीपी माझाने याबाबत वृत्त दिले आहे. 

बारामती लोकसभा राष्ट्रवादी काँग्रेसचा बालेकिल्ला आहे. खासदार सुप्रिया सुळे बारामतीचे नेतृत्व करतात. आतापर्यंत भाजपला हा गड जिंकता आला नाही. मात्र आता अजित पवार गट सोबत आल्याने भाजप बारामतीसाठी मोठी शक्ती लावणार असल्याची चर्चा राजकीय वर्तुळात रंगली आहे.