पुण्यात ऊन-पावसाचा खेळ

पुणे : पुणे (Pune) शहर आणि परिसरात गुरुवारी श्रावणसरी पडल्या. त्यामुळे कधी पावसाची हलकी सर तर, त्यानंतर लगेच पडलेला स्वच्छ सूर्यप्रकाश असा ऊन-पावसाचा खेळ पुणेकरांनी अनुभवला.

शहर आणि परिसरात गेल्या आठवड्यापासून पावसाने उघडीप दिली आहे. श्रावण सुरू झाल्यापासून शहरात ढगाळ वातावरण होते. पावसाची एखादी हलकी सर पडत होती. या पार्श्वभूमीवर पुण्यात श्रावणसरींनी हजेरी लावली. सकाळपासूनच शहरात ढगाळ वातावरण होते. पावसाच्या हलक्या सरी आणि त्यानंतर लगेच सूर्यप्रकाश पडत होता. संध्याकाळी साडेपाच वाजेपर्यंत शिवाजीनगर येथील वेधशाळेत ०.७ आणि लोहगाव येथे ०.७ मिलिमीटर पावसाची नोंद झाली.

शहरात १ जून ते २६ ऑगस्ट या दरम्यान सरासरी ४२६.१ मिलिमीटर पडतो. यंदा आतापर्यंत ३८३.४ मिलिमीटर पावसाची नोंद झाली आहे. सरासरीच्या तुलनेत ४२.७ मिलिमीटर कमी पाऊस पडल्याची माहिती हवामान खात्यातर्फे देण्यात आली. शहर आणि परिसरात शुक्रवारी (ता. २७) आकाश सामान्यतः ढगाळ राहून पावसाच्या हलक्या सरी पडण्याची शक्यता वर्तविण्यात आली आहे. शहरात पावसाच्या सरी पडल्याने ३१ अंश सेल्सिअसपर्यंत वाढलेला कमाल तापमानाचा पारा गुरुवारी २९.६ अंश सेल्सिअसपर्यंत कमी झाला होता. किमान तापमानाचा पारा २०.८ अंश सेल्सिअस नोंदला गेला.

राज्यात पावसाची उघडीप

पावसासाठी सध्या पोषक वातावरण नसल्याने राज्यात पावसाने उघडीप दिली आहे. अनेक ठिकाणी अंशतः ढगाळ हवामानासह कोरडे हवामान होत आहे. कोकणात तुरळक ठिकाणी पावसाने हजेरी लावली. खानदेश, मराठवाडा, पूर्व मध्य महाराष्ट्राचा भाग, पश्चिम विदर्भात उन्हाचा चटका वाढला आहे. त्यामुळे मागील तीन ते चार दिवसांपासून कमाल तापमानाचा पारा वाढला आहे. राज्यात सर्वाधिक कमाल तापमान चंद्रपूर येथे ३४ अंश सेल्सिअस नोंदले गेले.