Pune Crime News : येरवड्यात दहशत पसरवून वाहनांची तोडफोड करणाऱ्या टोळीविरुद्ध "मोका'अंतर्गत कारवाई

Pune News : येरवड्यातील लक्ष्मीनगर परिसरामध्ये नागरिकांमध्ये दहशत निर्माण करून वाहनांची तोडफोड करणाऱ्या सराईत गुन्हेगारासह त्याच्या टोळी विरुद्ध महाराष्ट्र संघटित गुन्हेगारी नियंत्रण कायद्यानुसार (मोका) कारवाई करण्यात आली आहे. जुनेद शेख याच्यासह त्याच्या चार साथीदारांविरुद्ध पोलिसांनी ही कारवाई केली आहे.

टोळी प्रमुख जुनेद एजाज शेख (वय २३, रा. पवार चाळ, लक्ष्मीनगर, येरवडा), अविनाश ऊर्फ सुक्‍या संजय शिंदे (वय २१, रा. येरवडा), मंगेश ऊर्फ घुल्या दीपक काळोखे (वय १९, रा. लक्ष्मीनगर, येरवडा) अशी अटक केलेल्यांची नावे आहेत.

निखिल ऊर्फ बॉडी जगन्नाथ शिंदे (वय २३, रा.लक्ष्मीनगर, येरवडा) व त्याचा साथीदार, अशा पाच जणांविरुद्ध "मोका'नुसार कारवाई करण्यात आली आहे. येरवड्यातील लक्ष्मीनगर परिसरात फिर्यादी व त्यांचा भाऊ बोलत थांबले होते.

यावेळी जुनेद शेख व त्याचे साथीदार लोखंडी धारदार हत्यारे, दगड घेऊन तेथे आले. त्यांनी फिर्यादी व त्यांच्या भावाला जीवे मारण्याची धमकी दिली. त्यानंतर त्यांच्या हातातील हत्यारे हवेत फिरवून नागरिकांना दमदाटी केली.

त्यानंतर संशयित आरोपींनी फिर्यादी, त्यांचा भाऊ व अन्य नागरिकांच्या २७ वाहनांची तोडफोड केली. याप्रकरणी येरवडा पोलिस ठाण्यात गुन्हा दाखल झाला. त्यानंतर पोलिसांनी जुनेद, अविनाश व मंगेशला अटक केली, तर निखिल व त्याचा साथीदार अद्याप फरारी आहेत. या प्रकरणाचा पोलिसांकडून तपास सुरू होता.

त्यावेळी जुनेद शेख हा टोळी बनवून आपल्या साथीदारांसह स्वतःच्या आर्थिक फायद्यासाठी तसेच वर्चस्व वाढविण्यासाठी विविध प्रकारचे गंभीर गुन्हे करून टोळीद्वारे दहशत निर्माण करत असल्याचे स्पष्ट झाले.

प्रतिबंधात्मक कारवाईनंतरही त्यांच्यात सुधारणा होत नसल्याने येरवडा पोलिस ठाण्याचे वरिष्ठ पोलिस निरीक्षक बाळकृष्ण कदम यांनी त्यांच्याविरुद्धच्या "मोका' अंतर्गत कारवाईचा प्रस्ताव पोलिस उपायुक्त शशिकांत बोराटे यांच्यामार्फत अतिरिक्त आयुक्त रंजन कुमार शर्मा यांच्याकडे सादर केला. त्यास पोलिस आयुक्त रितेश कुमार यांनी मान्यता दिली.