Adani : अदानी एंटरप्रायझेस उभारणार १६,६०० कोटी; ‘क्यूआयपी’ योजनेला संचालक मंडळाची मंजुरी

मुंबई : अदानी एंटरप्रायझेसच्या संचालक मंडळाने क्वालिफाईड इन्स्टिट्यूशनल प्लेसमेंट अर्थात ‘क्यूआयपी’च्या माध्यमातून १६,६०० कोटी रुपये उभारण्याच्या योजनेला मंजुरी दिली आहे. कंपनीने आज शेअर बाजाराला ही माहिती दिली.

‘क्यूआयपी’ अंतर्गत नोंदणीकृत कंपन्यांना शेअर पूर्णतः किंवा अंशतः परिवर्तनीय रोखे किंवा इतर सिक्युरिटीज पात्र संस्थात्मक खरेदीदारांना (क्यूआयबी) शेअरमध्ये रूपांतरित करण्याची परवानगी देते. कंपनीच्या २४ जून रोजी होणाऱ्या वार्षिक सर्वसाधारण सभेत भागधारकांची मंजुरी आणि इतर नियामक संमतींसह, आवश्यक मंजुरी मिळण्यावर हा निर्णय अवलंबून आहे, असेही कंपनीने स्पष्ट केले आहे.

अदानी एनर्जी सोल्युशन्सने ‘क्यूआयपी’ किंवा इतर मान्यताप्राप्त पर्यायांद्वारे १२,५०० कोटी रुपये उभारण्याची योजना जाहीर केली आहे. या निधी उभारणीच्या घोषणेनंतर, अदानी एंटरप्रायझेसचे शेअर ‘बीएसई’वर ३२९५ रुपयांवर व्यवहार करत होते. या शेअरने आता गेल्या वर्षी हिंडेनबर्ग संकटामुळे झालेले जवळजवळ सर्व नुकसान भरून काढले आहे. अदानी समूह युनिफाइड पेमेंट्स इंटरफेसवरील सेवेच्या परवान्यासाठी अर्ज करण्याचा विचार करत असून, ओपन नेटवर्क फॉर डिजिटल कॉमर्सद्वारे ऑनलाइन खरेदी सेवा सुरू करण्याचा प्रयत्न करत आहे.