Acharya Balkrishna Net Worth: पतंजली आयुर्वेद हे नाव ऐकताच आपल्याला योगगुरू रामदेव बाबा यांचा चेहरा डोळ्यासमोर येतो. पण रामदेव बाबा हे पतंजलीचा चेहरा आहेत, प्रत्यक्षात पतंजली कंपनी आचार्य बाळकृष्ण चालवतात.
फोर्ब्सच्या अब्जाधीशांच्या यादीनुसार, 15 जून 2023 रोजी त्यांची एकूण संपत्ती अंदाजे 3.6 अब्ज डॉलर म्हणजेच सुमारे 29,587 कोटी रुपये इतकी आहे. जगातील अब्जाधीशांच्या यादीत त्यांचा क्रमांक 810 वा आहे.
20 वर्षांपूर्वी योग आणि आयुर्वेदाच्या माध्यमातून अब्जाधीश बनता येते असे कोणी म्हटले असते तर ते अशक्य वाटले असते. पण आज पतंजली आयुर्वेदचे अध्यक्ष आचार्य बाळकृष्ण यांची निव्वळ संपत्ती पाहून हे शक्य आहे असे वाटेल.
आचार्य बालकृष्ण यांचा प्रवास?
1972 मध्ये हरिद्वार येथे जन्मलेले आचार्य बाळकृष्ण हरियाणातील खानपूर गुरुकुलमध्ये शिकत असताना रामदेव यांना भेटले. 1995 मध्ये रामदेव, आचार्य बालकृष्ण आणि आचार्य कर्मवीर यांनी मिळून दिव्य योग मंदिर ट्रस्ट सुरू केला.
हा ट्रस्ट हरिद्वारच्या कृपालू बाग आश्रमात सुरू झाला. ट्रस्टने योग शिकवायला सुरुवात केली. रामदेव यांची ओळख एक महान योगगुरू अशी झाली होती.
देशाच्या आणि जगाच्या कानाकोपऱ्यातून लोक रामदेव यांच्याकडे योग शिकायला येऊ लागले. त्यांचा योगाचा कार्यक्रम पहाटे टीव्हीवर यायचा आणि लाखो लोक टीव्हीसमोर बसून योगाभ्यास करायचे.
2006 मध्ये रामदेव, आचार्य बालकृष्ण आणि आचार्य कर्मवीर यांनी पतंजली आयुर्वेदाची सुरुवात केली. यासाठी योगगुरु रामदेव यांच्या सुनीता आणि श्रावण पोद्दार या दोन भक्तांनी कर्ज दिले होते.
पतंजली आयुर्वेद आयुर्वेदिक औषधांची उत्पादने आणि कॉस्मेटिक उत्पादने तयार करते. यासोबतच कंपनीने काही काळापूर्वी फॅशन आणि कपड्यांच्या व्यवसायातही पाऊल टाकले आहे.
पतंजली आयुर्वेदाने 2019 मध्ये रुची सोयाचे अधिग्रहण केले. रुची सोयाचे नंतर पतंजली फूड्स असे नामकरण करण्यात आले. पतंजली फूड्स अंतर्गत स्नॅक्स, किराणा सामान तयार केले जातात.
रामदेव बाबा यांची पतंजलीमध्ये कोणतीही भागीदारी नाही. तर आचार्य बालकृष्ण यांच्याकडे कंपनीचे 94 टक्के शेअर्स आहेत. बालकृष्ण पगार घेत नाहीत आणि दररोज 15 तास काम करतात.
फोर्ब्स वेबसाईटनुसार, आचार्य बालकृष्ण यांचे मत आहे की, पैशाचा वापर लोकांच्या सेवेसाठी केला पाहिजे, स्वत:च्या सेवेसाठी नाही.
पतंजलीची उलाढाल किती आहे?
पतंजलीची वार्षिक उलाढाल 40 हजार कोटींच्या जवळपास आहे. रामदेव यांनी सप्टेंबर 2022 मध्ये पत्रकार परिषदेत ही माहिती दिली होती. पाच वर्षांत कंपनीची उलाढाल दुपटीने वाढवण्याचे कंपनीचे लक्ष्य असल्याचे ते म्हणाले होते.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
