Bajaj Auto : जगभरात बजाज ऑटोचा डंका ! पहिल्या तिमाहीत १९४१ कोटींचा नफा; आफ्रिकेतील निर्यात महसूल दुहेरी अंकात

पुणे : बजाज ऑटोने आर्थिक वर्ष २०२४-२५च्या पहिल्या तिमाहीत १९४१ कोटी रुपयांचा निव्वळ नफा मिळवला असून, यात वार्षिक १८ टक्क्यांनी वाढ झाली आहे. कंपनीच्या एकत्रित महसुलातही १६ टक्क्यांनी वाढ होऊन तो ११,९३२ कोटी रुपयांवर पोहोचला आहे. मजबूत वाहन विक्री, स्पेअरमधून विक्रमी कमाई आणि देशांतर्गत व निर्यात दोन्ही व्यवसायांमध्ये वाढ, यामुळे महसूल वाढल्याचे कंपनीने म्हटले आहे.

मोटारसायकल, व्यावसायिक वाहने आणि इलेक्ट्रिक स्कूटर पोर्टफोलिओमध्ये सातत्यपूर्ण वाढीमुळे बजाज ऑटोचा देशांतर्गत व्यवसाय सलग नवव्या तिमाहीत दुहेरी अंकांनी वाढला आहे. आर्थिक वर्ष २०२४च्या पहिल्या तिमाहीतील सहा टक्क्यांच्या तुलनेत या तिमाहीत इलेक्ट्रिक दुचाकी आणि तीन चाकी वाहनांचा देशांतर्गत विक्री हिस्सा १४ टक्के आहे.

लॅटिन अमेरिकेतील बाजारपेठेने आतापर्यंतचा उच्चांक गाठला आहे, तर आफ्रिका आणि आशियातील निर्यात महसूलही दुहेरी अंकात वाढला आहे. बजाज ऑटोकडे १६,७६४ कोटी रुपयांची रोख रक्कम आहे. मजबूत मुक्त रोख प्रवाह कायम आहे.