Raghuram Rajan: मोदी तिसऱ्यांदा पंतप्रधान झाल्यास अर्थव्यवस्थेचं काय होणार? रघुराम राजन म्हणाले...

Raghuram Rajan: लोकसभा निवडणुका अंतिम टप्प्यात आहेत. मतदानाचा सातवा टप्पा 1 जून रोजी होईल आणि निकाल 4 जून रोजी जाहीर केला जाईल. सत्ताधारी पक्ष आणि विरोधी पक्षांचे निवडणुकीत पराभव आणि विजयाबाबत स्वतःचे दावे आहेत. भाजपा 400 हून अधिक जागा जिंकण्याचा दावा करीत आहे. दरम्यान, आरबीआयचे माजी गव्हर्नर रघुराम राजन म्हणाले की, नरेंद्र मोदी तिसऱ्यांदा पंतप्रधान झाले किंवा नाही झाले तरी भारत त्याच्या आर्थिक धोरणाच्या मार्गावर पुढे जात राहील.

राजन यांनी ब्लूमबर्ग टीव्हीला दिलेल्या मुलाखतीत हे वक्तव्य केलं. ते म्हणाले की, भारतीय धोरणात सातत्य आहे. कोणतेही सरकार आले तरी ते अनेक चांगल्या गोष्टी पुढे नेतात. नवीन सरकार लवकरच अर्थसंकल्प जाहीर करणार आहे. यामध्ये अनेक चांगली कामे पुढे नेण्यात येणार असून त्यात आणखी काय बदल करता येतील हेही पाहिले जाणार आहे.

आरबीआयचे माजी गव्हर्नर म्हणाले की, देशात पायाभूत सुविधांची मोठी कमतरता लक्षात घेता मोदी सरकारच्या काळात त्यावर खर्च करणे आवश्यक होते. पण पुढे जाऊन भारताला आपल्या पायाभूत सुविधांच्या गुणवत्तेकडे लक्ष द्यावे लागेल आणि त्याचे फायदे मोठ्या कंपन्यांपर्यंत मर्यादित नसतील याची काळजी घ्यावी लागेल.

या निवडणुकीत भाजप पुन्हा सरकार स्थापन करेल अशी अपेक्षा आहे. भाजपने प्रचंड बहुमताने सरकार स्थापन केल्यास आर्थिक आघाडीवर अनेक मोठ्या सुधारणा पुढे नेल्या जाऊ शकतात, असे मानले जात आहे. दुसरीकडे, भाजप सरकार स्थापन करण्यात अपयशी झाल्यास शेअर बाजारात मोठी विक्री दिसून येईल.