India Retirement Planning : देशातील घरगुती बचतीत मोठी घसरण झाल्याचा फटका निवृत्तीसाठीच्या आर्थिक नियोजनाला बसला आहे. गेल्या वर्षीच्या ४५ टक्के सेवानिवृत्तीच्या आर्थिक नियोजनाच्या तुलनेत यंदा हे प्रमाण ३८ टक्क्यांवर आले आहे, असे निरीक्षण ‘बँकबझार’ संस्थेने केलेल्या वार्षिक सर्वेक्षण अहवालात नोंदविण्यात आले आहे.
या अहवालानुसार, या वर्षी निवृत्तीनंतरच्या आयुष्यासाठी गुंतवणूक करणाऱ्या महिलांचे प्रमाण खूप कमी झाले आहे. गेल्या वर्षी हे प्रमाण ४८.४५ टक्के होते, ते या वर्षी ३४.३ टक्क्यांपर्यंत कमी झाले आहे, तर पुरुषांचे प्रमाण तुलनेत स्थिर असल्याचे आढळून आले आहे. गेल्या वर्षी निवृत्तीनियोजन करणाऱ्या पुरुषांचे प्रमाण ४१.८६ टक्के होते, ते यंदा ४०.१ टक्के झाले आहे. यंदा केवळ एक टक्का घट झाली आहे.
या वर्षी निवृत्तीनिधी जमा करण्यासाठी काम करणाऱ्या महिलांचे प्रमाण गेल्या वर्षीच्या ६८ टक्क्यांवरून ५७ टक्क्यांपर्यंत कमी झाले आहे. तुलनेत पुरुषांचे प्रमाण मात्र, ५४ टक्क्यांवरून ५५ टक्क्यांपर्यंत वाढले आहे. निवृत्तीनिधीसाठी काहीही आर्थिक नियोजन नसणाऱ्या महिलांचे प्रमाण २०२२ मधील ३२ टक्क्यांवरून ४२ टक्क्यांपर्यंत वाढले आहे. ही चिंताजनक बाब आहे, असेही या अहवालात नमूद करण्यात आले आहे.
निवृत्तीनंतरच्या आयुष्यासाठी आर्थिक तरतूद करण्यासाठी नियोजनाची सुरुवात करणाऱ्या २० ते ३० वर्षे वयोगटातील लोकांचे प्रमाणही यंदा कमी झाले आहे. या वयोगटातील साधारण नऊ टक्के लोकांनी निवृत्तीसाठी ५० ते ७५ लाख रुपयांचा निधी उभारण्याची योजना असल्याचे, तर आठ टक्के लोकांनी ७५ लाख ते एक कोटी रुपये निधी जमा करण्याचे उद्दिष्ट असल्याचे सांगितले.
गेल्या वर्षी १८ टक्के लोकांनी ५० ते ७५ लाख रुपये निधी उभारण्याचे , तर १७ टक्के लोकांनी ७५ लाख ते एक कोटी रुपयांचे उद्दिष्ट असल्याचे सांगितले होते. महिलांमध्ये, २८-३४ वर्षे वयोगटातील २२ टक्के महिलांनी ५०-७५ लाख रुपये निवृत्तीनिधी उभारायचे उद्दिष्ट असल्याचे सांगितले, तर २२ ते २७ वर्षे वयोगटातील सात टक्के महिला आणि २८ ते ३४ वर्षे वयोगटातील १३ टक्के महिलांना १.५ ते दोन कोटी रुपये उभे करायचे आहेत.
निवृत्तीनिधीसाठी नियोजन करणाऱ्या पुरुषांचे प्रमाण वार्षिक एक टक्का कमी.
बचत करणाऱ्या महिलांच्या संख्येत गेल्या वर्षीच्या ४८.४५ टक्क्यांवरून यंदा ३४.३ टक्क्यांपर्यंत घट.
काहीही नियोजन नसणाऱ्या महिलांच्या प्रमाणात २०२२ मधील ३२ टक्क्यांवरून ४२ टक्क्यांपर्यंत वाढ.
निधीसाठी बचत खात्यांना ६७ टक्के, मुदत ठेवी, म्युच्युअल फंडांना ५७ टक्के लोकांची पसंती.
५० ते ७५ लाखांच्या निधीचे उद्दिष्ट असणाऱ्यांचे प्रमाण १८ वरून नऊ टक्क्यांवर.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
