Ayodhya: राम मंदिरामुळे अयोध्येतील पर्यटनाला मिळणार चालना; सरकारची होणार इतक्या कोटींची कमाई

Ayodhya Ram Mandir: राम मंदिराच्या उद्घाटनानंतर उत्तर प्रदेशच्या पर्यटन क्षेत्रात वाढ होणार आहे. भारतीयांसाठी एक प्रमुख तीर्थक्षेत्र असलेल्या अयोध्यामध्ये आधीच आर्थिक भरभराट होत आहे. अनेक कंपन्या येथे व्यवसाय सुरू करणार आहेत, त्यामुळे गुंतवणुकीत मोठी वाढ झाली आहे. यूपीमध्ये पर्यटन क्षेत्राला चालना दिल्याने उत्तर प्रदेश सरकारचीही भरभराट होणार आहे. एसबीआयच्या एका अहवालात याचा तपशीलवार खुलासा करण्यात आला आहे.

20-25 हजार कोटी रुपयांचा महसूल

स्टेट बँक ऑफ इंडियाच्या अहवालानुसार, अयोध्येतील राम मंदिर आणि राज्य सरकारच्या इतर पर्यटन योजनांमुळे यूपी सरकारला मोठा पैसा मिळणार असल्याचे सांगण्यात आले आहे. संशोधकांनी अंदाज व्यक्त केला आहे की, उत्तर प्रदेश सरकारला आर्थिक वर्ष 2025 मध्ये 20,000 ते 25,000 कोटी रुपयांचे अतिरिक्त उत्पन्न मिळू शकते.

एसबीआयच्या अहवालात असा दावा करण्यात आला आहे की उत्तर प्रदेश सरकारच्या अर्थसंकल्पानुसार आर्थिक वर्ष 2024 मध्ये त्याचा कर महसूल 2.5 लाख कोटी रुपयांपर्यंत पोहोचण्याची अपेक्षा आहे.

SBI संशोधकांनी अंदाज वर्तवला आहे की 2024 मध्ये उत्तर प्रदेशातील पर्यटकांनी केलेला खर्च 2022च्या तुलनेत जवळपास दुप्पट होऊ शकतो. अयोध्येतील राम मंदिर आणि उत्तर प्रदेश सरकारने पर्यटन क्षेत्राला चालना देण्यासाठी उचललेल्या पावलांमुळे पर्यटकांचा खर्च 4 लाख कोटी रुपयांच्या वर जाऊ शकतो.

बिझनेस टुडेवर प्रकाशित झालेल्या या अहवालात असे सांगण्यात आले आहे की, 2022 मध्ये देशी पर्यटकांनी उत्तर प्रदेशमध्ये 2.2 लाख कोटी रुपये खर्च केले होते, तर विदेशी पर्यटकांनी केलेल्या खर्चाचा आकडा 10,000 कोटी रुपये होता.

अयोध्या हे पूर्वीपासूनच श्रद्धेचे मोठे केंद्र आहे आणि येथे मोठ्या संख्येने पर्यटक येतात. उत्तर प्रदेशातील इतर पर्यटन स्थळांव्यतिरिक्त, 2022 मध्ये विक्रमी 2.21 कोटी पर्यटक एकट्या अयोध्येत पोहोचले होते. आता राम मंदिराचे उद्घाटन होणार असल्याने पर्यटकांची संख्या आणखी वाढेल, असा अंदाज आहे.