Mukesh Ambani: मुकेश अंबानींचा डीपफेक व्हिडिओ व्हायरल; मुंबईतील डॉक्टरला 7 लाखांचा गंडा, काय आहे प्रकरण?

Mukesh Ambani Deepfake Video: अंधेरी येथील 54 वर्षीय महिला डॉक्टर शेअर ट्रेडिंग घोटाळ्याला बळी पडल्या आहेत. त्यांना 7 लाख रुपयांहून अधिक नुकसान झाले आहे. रिल्स पाहत असताना त्यांना उद्योगपती मुकेश अंबानी यांचा व्हिडिओ दिसला. रिल्सच्या खालील लिंकवर क्लिक केले आणि त्या व्हॉट्सॲप ग्रुपला जॉईन झाल्या. या ग्रुपमध्ये लोक ट्रेडिंग टिप्स देत होते.

महिला डॉक्टरकडून गुंतवणुकीच्या नावाखाली सात लाखांहून अधिक रुपये खात्यात ट्रान्सफर करण्यात आले. पण जेव्हा नफ्याची मागणी केली तेव्हा त्यांना नकार देण्यात आला. जेव्हा महिलेला हे समजले की हा व्हिडिओ डीपफेक आहे, त्यानंतर महिला डॉक्टरने ओशिवरा पोलिस ठाण्यात गुन्हा दाखल केला.

15 जून रोजी ओशिवरा येथे राहणारी एक महिला डॉक्टर मुकेश अंबानींचा एक व्हिडिओ पाहत होती, ज्यामध्ये अंबानी राजीव शर्मा नावाच्या व्यक्तीचे कौतुक करताना आणि त्यांना त्यांचे गुरु म्हणताना दिसले. महिलेने व्हिडिओच्या खाली दिलेल्या लिंकवर बटण दाबताच व्हॉट्सॲप ग्रुप जॉईन केला.

या व्हॉट्सॲप ग्रुपची अॅडमीन जेनी नावाची एक महिला होती. जेनीने महिला डॉक्टरवर दबाव आणला आणि त्यांना 16 व्यवहारांद्वारे 7,09,104/- रुपये गुंतवण्यास भाग पाडले. परंतु जेव्हा महिला डॉक्टरने जेनीला नफा तिच्या खात्यात टाकण्यास सांगितले तेव्हा जेनीने नकार दिला. यानंतर महिलेला आपली फसवणूक झाल्याचे लक्षात आले आणि जेव्हा तिला समजले तेव्हा अंबानींचा व्हिडिओ डीपफेक असल्याचे समोर आले.

सायबर क्राइमचे डीसीपी दत्ता नलावडे यांच्या म्हणण्यानुसार, जेव्हा जेव्हा तुम्हाला एखाद्या मोठ्या व्यक्तीच्या नावाने एखादा व्हिडिओ दाखवला जातो, तेव्हा तुम्ही तो काळजीपूर्वक पाहिल्यास तुम्हाला कळेल की बॉडी लँग्वेज आणि ओठांची हालचाल वेगळी आहे. हे कृत्रिम बुद्धिमत्तेद्वारे केले जाते. असे डीपफेक व्हिडिओ ओळखा, कोणत्याही मोहात पडू नका.

हे आपल्याला माहित असणे आवश्यक आहे

- अशा व्हिडिओंचा कोणत्याही कंपनीशी किंवा अधिकाऱ्यांशी काहीही संबंध नाही

- फॉलोअर्स  वाढवण्यासाठी सेलिब्रिटींचे डीपफेक व्हिडिओ तयार केले जातात

- पैसे कमावण्याच्या आशेने फसवणूक करतात.

- गुंतवणूकदार आणि सामान्य लोकांनी अशा व्हिडिओंवर विश्वास ठेवू नये.