Fact Check: मतदान न केल्यास तुमच्या बँक खात्यातून 350 रुपये कापले जाणार? काय आहे प्रकरण

PIB Fact Check: सध्या सोशल मीडियावर एक बातमी व्हायरल होत आहे, ज्यामध्ये निवडणूक आयोगाच्या हवाल्याने दावा केला जात आहे की लोकसभा निवडणुकीत मतदान न केल्यास बँक खात्यातून 350 रुपये कापले जातील. ही बातमी इंटरनेटवर व्हायरल होत आहे.

पुढील वर्षी 2024 मध्ये लोकसभा निवडणुका होणार आहेत. अशा परिस्थितीत सध्या सोशल मीडियावर एक मेसेज व्हायरल होत आहे ज्यात निवडणूक आयोगाचा हवाला देत लोकसभा निवडणुकीत मतदान न करणे लोकांना महागात पडू शकते. ही बातमी वृत्तपत्राच्या क्लिपिंगच्या फोटोच्या रूपाने सोशल मीडियावर व्हायरल होत आहे.

काय आहे प्रकरण?

सोशल मीडियावर अनेक लोक ही बातमी शेअर करत आहेत, ज्यामध्ये निवडणूक आयोगावर टीका होत आहे. निवडणूक आयोगाने न्यायालयाची पूर्वपरवानगी घेतल्याचे या बातमीत म्हटले आहे. या बातमीत असे म्हटले आहे की जे मतदान करणार नाहीत त्यांची ओळख आधार कार्डद्वारे केली जाईल आणि त्या कार्डशी जोडलेल्या त्यांच्या बँक खात्यातून 350 रुपये कापले जातील.

काय व्हायरल बातमी मागचे सत्य?

प्रेस इन्फॉर्मेशन ब्युरोने (पीआयबी) त्यांच्या तपासणीमध्ये या व्हायरल बातमीचे सत्य सांगितले आहे. पीआयबीनुसार, ही बातमी पूर्णपणे खोटी आहे. निवडणूक आयोगाच्या प्रवक्त्याच्या एक्स अकाउंटवर असेही म्हटले आहे की, “आमच्या लक्षात आले आहे की अशा प्रकारच्या खोट्या बातम्या काही व्हॉट्सअॅप ग्रुप्स आणि सोशल मीडियावर व्हायरल केल्या जात आहेत.

निवडणूक आयोगाने असा कोणताही निर्णय घेतलेला नाही, असेही पीआयबीने म्हटले आहे. जबाबदार नागरिक व्हा, मतदान करा !! मात्र, मतदानासाठी कोणी कोणावर दबाव आणू शकत नाही किंवा ब्लॅकमेल करू शकत नाही.