SEBI: प्रसिद्ध म्युच्युअल फंडवर सेबीची मोठी कारवाई; घोटाळ्याची शक्यता, तुमच्या पैशांचे काय होणार?

Quant Mutual Fund: देशातील बाजार नियामक सिक्युरिटीज अँड एक्स्चेंज बोर्ड ऑफ इंडियाने (SEBI) फ्रंट रनिंग संदर्भात संदीप टंडन यांच्या मालकीच्या क्वांट म्युच्युअल फंडावर जप्तीची कारवाई केली आहे. मुंबई आणि हैदराबादमध्ये दोन ठिकाणी जप्तीची कारवाई करण्यात आली.

क्वांट म्युच्युअल फंडाच्या मुंबई मुख्यालयाव्यतिरिक्त हैदराबादमध्येही छापे टाकण्यात आले. शुक्रवारी (21 जून) क्वांट डीलर आणि या प्रकरणाशी संबंधित लोकांचीही चौकशी करण्यात आली. सूत्रांनी सांगितले की ऑपरेशन्सचा नफा सुमारे 20 कोटी रुपये आहे आणि सेबीने त्याच्या मॉनिटरिंग टीमला संशयास्पद ट्रेडिंग पॅटर्न आढळल्यानंतर फंड हाऊसच्या कामकाजाचा शोध सुरू केला आहे.

संदीप टंडन हे क्वांट म्युच्युअल फंडाचे संस्थापक

क्वांट म्युच्युअल फंडाची स्थापना संदीप टंडन यांनी केली आहे. या फंडाला 2017 मध्ये सेबीकडून म्युच्युअल फंड परवाना मिळाला. हा देशातील सर्वात वेगाने वाढणारा म्युच्युअल फंड आहे, ज्याची मालमत्ता 2019 मध्ये 100 कोटी रुपयांवरून सध्या 90,000 कोटी रुपयांपेक्षा जास्त झाली आहे.

फ्रंट-रनिंग म्हणजे काय?

फ्रंट रनिंग म्हणजे अशी बेकायदेशीर कृती, जिथे फंड मॅनेजर/डीलर/ब्रोकरला आगामी मोठ्या ट्रेडबद्दल माहिती असते आणि त्या आधारावर ते आधी ऑर्डर देतात आणि नफा मिळवतात. मार्केट रेग्युलेटर सेबी म्युच्युअल फंडांविरुद्ध आक्रमक कारवाई करत आहे.

गुंतवणूकदारांचे नुकसान होऊ शकते

फंड व्यवस्थापक किंवा कंपनीच्या फसवणुकीमुळे गुंतवणूकदारांचे नुकसान होऊ शकते. फसवणुकीमुळे अशा फंडांची विश्वासार्हता घसरते आणि गुंतवणूकदार त्यातून पैसे काढू शकतात.

सेबीने मोबाईल आणि संगणक जप्त केले

या प्रकरणाशी संबंधित एका व्यक्तीने सांगितले की, सेबीच्या मॉनिटरिंग सिस्टममध्ये हे उघड झाले आहे की संशयास्पद युनिट्सचे व्यवहार क्वांट म्युच्युअल फंडाच्या व्यवहारांशी तंतोतंत जुळत आहेत. आपल्या कारवाईत सेबीने फंड हाऊसचे मोबाइल फोन आणि संगणक जप्त केले आहेत. सर्व डिजिटल उपकरणे जप्त करण्यात आली आहेत.

जप्त केलेल्या डिजिटल उपकरणांची कसून तपासणी केली जाईल, त्यानंतर क्वांट म्युच्युअल फंडाला विशिष्ट युनिट्सची माहिती कोण देत होते हे सेबी शोधून काढेल.

फंड हाऊसने निवेदन केले जारी

क्वांट म्युच्युअल फंडाचे संस्थापक संदीप टंडन यांनी एक निवेदन जारी केले आहे ज्यात त्यांनी म्हटले आहे की, "अलीकडेच, क्वांट म्युच्युअल फंडाची सेबीकडून चौकशी होत आहे आणि या प्रकरणाबाबत तुम्हाला काही समस्या असतील तर आम्ही त्या सोडवू. आम्ही तुम्हाला खात्री देतो की क्वांट म्युच्युअल फंड ही एक नियमन केलेली संस्था आहे आणि आम्ही तपासादरम्यान सेबीला सहकार्य करु"