Hurun Global 500: रिलायन्स इंडस्ट्रीज देशात नंबर वन; अदानींच्या कंपन्या टॉप 500 यादीतून बाहेर

Hurun Global 500: रिलायन्स इंडस्ट्रीज ही भारतातील सर्वात मौल्यवान कंपनी बनली आहे. बुधवारी प्रसिद्ध झालेल्या 2023 च्या हुरुन ग्लोबल 500 अहवालात ही माहिती देण्यात आली. या यादीमध्ये सरकारी नियंत्रणाखाली नसलेल्या जगातील 500 सर्वात मौल्यवान कंपन्यांचा समावेश आहे. आश्चर्याची बाब म्हणजे या यादीत समाविष्ट असलेल्या जगातील टॉप 40 कंपन्यांपैकी एकही भारतीय कंपनी नाही.

रिलायन्स इंडस्ट्रीज 198 अब्ज डॉलरच्या मुल्यांकनासह 44व्या स्थानावर आहे. अहवालात म्हटले आहे की, रिलायन्स इंडस्ट्रीज, जी गेल्या वर्षी भारतातील सर्वात मौल्यवान कंपनी होती, ती यावेळी यादीत 10 स्थानांनी घसरली आहे कारण कंपनीच्या एकूण मूल्यात 2 टक्क्यांनी घट झाली आहे.

रिलायन्स इंडस्ट्रीजच्या खालोखाल टाटा कन्सल्टन्सी सर्व्हिसेस (60) आणि एचडीएफसी बँक (68) आहेत. वर्षभरात टाटा कन्सल्टन्सी सर्व्हिसेसची एकूण मालमत्ता 14 टक्क्यांनी वाढून 158 अब्ज डॉलर झाली आहे. 2023 मध्ये तिच्या क्रमवारीत पाच स्थानांनी सुधारणा झाली आहे.

अहवालात म्हटले आहे की, एचडीएफसी आणि एचडीएफसी बँकेच्या विलीनीकरणामुळे, कंपनी यादीत 43 स्थानावरुन 68 व्या स्थानावर पोहोचली आहे. टायटन कंपनी आणि सन फार्मास्युटिकल्स इंडस्ट्रीजनेही टॉप 500 कंपन्यांमध्ये आपले स्थान निर्माण केले आहे. टायटनसह 90 नवीन स्टोअर्सचा विस्तार आणि इस्रायलमधील प्रमुख अधिग्रहणांमुळे सन फार्माने या यादीत स्थान मिळवले.

Binance आणि Activision Blizzard सारख्या 48 कंपन्या कमी मूल्यांकनामुळे या यादीतून बाहेर पडल्या होत्या. भारतात, अदानी समूहाच्या अदानी ट्रान्समिशन, अदानी ग्रीन एनर्जी आणि अदानी टोटल गॅस याही टॉप 500 कंपन्यांच्या यादीतून बाहेर पडल्या.

जगातील पाच कंपन्यांनी एक ट्रिलियन डॉलर्सचे मूल्यांकन ओलांडण्याची ही पहिलीच वेळ असल्याचे या अहवालात म्हटले आहे. यामध्ये Apple, Microsoft, Alphabet, Amazon आणि Nvidia यांचा समावेश आहे.

चॅट जीपीटीचा प्रभाव

मायक्रोसॉफ्ट (708 बिलियन डॉलर वाढ) आणि Nvidia (697 बिलियन डॉलर वाढ) या दोन कंपन्या होत्या ज्यांचे मूल्यांकन सर्वात जास्त वाढले आहे. दोन्ही कंपन्या आर्टिफिशियल इंटेलिजन्स सॉफ्टवेअर चॅट जीपीटीशी जोडलेल्या आहेत. मायक्रोसॉफ्टने चॅट जीपीटीची मूळ कंपनी ओपन एआयमध्ये मोठी गुंतवणूक करण्याची घोषणा केली आहे.