Vishwakarma Scheme: विश्वकर्मा योजनेअंतर्गत 5% व्याजासह 1 लाख रुपयांपर्यंत मिळणार कर्ज

Vishwakarma Scheme: 77व्या स्वातंत्र्यदिनानिमित्त पंतप्रधान नरेंद्र मोदी यांनी लाल किल्ल्यावरून देशाला संबोधित करताना कारागीरांसाठी 'विश्वकर्मा योजना' जाहीर केली. मोदी मंत्रिमंडळाने बुधवारी या योजनेला मंजुरी दिली आहे. ही योजना विशिष्ट शैलीतील कुशल कामगारांसाठी असेल.

तिचे पूर्ण नाव PM 'विश्वकर्मा कौशल सन्मान योजना' किंवा 'PM विकास योजना' (PM विश्वकर्मा कौशल सन्मान योजना - PM VIKAS) आहे. या योजनेचे बजेट 2023 च्या सर्वसाधारण अर्थसंकल्पात ठेवण्यात आले होते.

'विश्वकर्मा योजने'मध्ये 13 ते 15 हजार कोटी रुपयांची गुंतवणूक होणार आहे. विश्वकर्मा योजनेंतर्गत कमाल 5% व्याजासह 1 लाख रुपये कर्ज दिले जाणार आहे अशी माहिती केंद्रीय मंत्री अश्विनी वैष्णव यांनी दिली.

17 सप्टेंबर 2023 रोजी विश्वकर्मा पूजेच्या निमित्ताने 'विश्वकर्मा योजना' सुरू करण्यात येणार आहे. हाच दिवस पंतप्रधान नरेंद्र मोदी यांचाही वाढदिवस आहे.

'विश्वकर्मा योजने'चा उद्देश कौशल्य प्रशिक्षण, तंत्रज्ञान आणि आर्थिक सहाय्य देऊन देशभरातील कारागीर आणि कारागीरांच्या क्षमता वाढवणे हा आहे. या योजनेअंतर्गत कुशल कारागिरांना एमएसएमईशी जोडले जाईल, जेणेकरून त्यांना चांगली बाजारपेठ मिळू शकेल.

योजनेचा लाभ कोणाला मिळणार?

सुतार, सोनार, शिल्पकार आणि कुंभार या क्षेत्रात काम करणाऱ्या लोकांना पीएम विश्वकर्मा योजनेचा लाभ मिळणार आहे. याद्वारे कारागिरांच्या उत्पादनांचा आणि सेवांचा दर्जा वाढविण्याचा तसेच त्यांना देशांतर्गत बाजारपेठ आणि जागतिक बाजारपेठेशी जोडण्याचा सरकारचा प्रयत्न आहे.

"पीएम विश्वकर्मा योजनेंतर्गत, कारागीर यांना पीएम विश्वकर्मा प्रमाणपत्रे, ओळखपत्र, क्रेडिट सपोर्ट ₹ 1 लाख (पहिल्या टप्प्यात) आणि ₹ 2 लाख (दुसऱ्या टप्प्यात) 5% सवलतीच्या व्याजदराद्वारे मान्यता दिली जाईल.'' केंद्राने एका निवेदनात म्हटले आहे.

"पीएम विश्वकर्मा" अंतर्गत पहिल्या टप्प्यात समाविष्ट असलेल्यांमध्ये सुतार, बोट बनवणारे, लोहार, कुलूप बनवणारे, सोनार, कुंभार, शिल्पकार आणि गवंडी यांचा समावेश आहे.