New Rule From 1 January: सिम कार्डपासून ते ITR पर्यंत जानेवारीपासून बदलणार 'हे' पाच नियम

New Rule From 1 January 2024: नवीन वर्षात काही नियमांमध्ये बदल होणार आहेत, ज्याचा परिणाम ग्राहकांच्या खिशावर होणार आहे. जानेवारी 2024 च्या सुरुवातीला अनेक नियम लागू होणार आहेत, ज्याबद्दल तुम्हाला माहिती असली पाहिजे. यामध्ये सिम कार्ड ते विम्याशी संबंधित नियमांचा समावेश आहे. जाणून घेऊया.

1. सिम कार्डशी संबंधित नियम

सिमकार्ड खरेदीची पद्धत बदलणार आहे. ऑनलाइन फसवणुकीवर नियंत्रण ठेवण्यासाठी सरकार सिमकार्डच्या विक्री आणि खरेदीवर नियंत्रण ठेवण्याचा विचार करत आहे. आता सिमकार्ड खरेदीसाठी डिजिटल केवायसी अनिवार्य असणार आहे.

दूरसंचार कंपन्या आता सिम खरेदी करणाऱ्या सर्व ग्राहकांना बायोमेट्रिक डेटा देणे बंधनकारक करणार आहेत. बनावट सिम कार्ड बाळगणाऱ्यांना 3 वर्षांपर्यंत तुरुंगवास आणि 50 लाख रुपयांपर्यंत दंड होऊ शकतो.

2. बँक लॉकरशी संबंधित नियम

बँकांमध्ये लॉकर असलेल्या ग्राहकांना 31 डिसेंबरपर्यंत सुधारित बँक लॉकर करारावर स्वाक्षरी करून रक्कम जमा करण्याचा पर्याय आहे. त्यानंतर त्यांनी तसे न केल्यास 1 जानेवारीपासून त्यांचे लॉकर बंद केले जाईल.

3. विमा पॉलिसी

विमा नियामक IRDAI (Insurance Regulatory and Development Authority of India) ने सर्व विमा कंपन्यांना 1 जानेवारीपासून विमा ग्राहकांना ग्राहक माहिती पत्रक देण्याचे निर्देश दिले आहेत, ज्यामध्ये विम्याशी संबंधित सर्व महत्त्वाची माहिती त्यांना सोप्या शब्दात समजावून सांगावी असे आदेश दिले आहेत.

4. UPI खाते बंद केले जाईल

नॅशनल पेमेंट कॉर्पोरेशन ऑफ इंडिया (NPCI) ने पेमेंट अॅप्स आणि Google Pay, Paytm आणि PhonePe सारख्या बँकांना असे UPI आयडी आणि नंबर निष्क्रिय करण्यास सांगितले आहे जे एका वर्षापेक्षा जास्त काळ सक्रिय नाहीत. यासाठी अंतिम तारीख 31 डिसेंबर 2023 ठेवण्यात आली आहे.

5. आयकर रिटर्न

ज्या करदात्यांनी 2022-23 या आर्थिक वर्षासाठी आयकर रिटर्न भरले नाहीत त्यांना 1 जानेवारीपासून त्यांचे उशीर झालेले रिटर्न भरता येणार नाही. तसेच ज्या करदात्यांच्या रिटर्नमध्ये त्रुटी आहेत ते त्यांचे सुधारित रिटर्न भरू शकणार नाहीत.