भू-राजकीय समस्यांमुळे जागतिक पातलीवर मालवाहतुकीत अडथळे येत असल्याने व्यापारी मालाच्या आयात-निर्यातीत घट

नवी दिल्ली : भू-राजकीय समस्यांमुळे जागतिक पातलीवर मालवाहतुकीत अडथळे येत असल्याने आयात-निर्यातीत घट झाली आहे. त्यामुळे या महिन्यात व्यापारी तूट १५.६ अब्ज डॉलर झाली आहे, असे वाणिज्य मंत्रालयाच्या आकडेवारीवरून स्पष्ट झाले आहे.

देशातून होणाऱ्या व्यापारी मालाच्या निर्यातीत मार्चमध्ये किरकोळ घट झाली असून, ती ४१.६८ अब्ज डॉलरची आहे. संपूर्ण २०२३-२४ या वर्षात निर्यात वार्षिक ३.११ टक्क्यांनी घसरून ४३७ अब्ज डॉलरची झाली आहे. आयातही ५.९८ टक्क्यांनी कमी होऊन ५७.२८ अब्ज डॉलरवर आली आहे.

वर्ष २०२३-२४ मध्ये आयात ६७७.२४ अब्ज डॉलर होती. मागील वर्षातील ७१५.९७ अब्ज डॉलरपेक्षा ती ५.४१ टक्क्यांनी कमी आहे. व्यापारी तूट २४०.१७ अब्ज डॉलर आहे, वाणिज्य सचिव सुनील बर्थवाल यांनी आज येथे ही माहिती दिली.

आखाती देशांतील तणाव वाढत आहे, त्यावर वाणिज्य मंत्रालय लक्ष ठेवून आहे आणि योग्य कारवाई करेल, असे बर्थवाल यांनी सांगितले. मात्र, सध्या सुरू असलेल्या लोकसभा निवडणुकीच्या पार्श्वभूमीवर आदर्श आचारसंहितेमुळे त्यांनी सविस्तर खुलासा केला नाही. व्यापारी आणि सेवा क्षेत्राची मिळून एकूण निर्यात गेल्या वर्षीच्या सर्वोच्च विक्रमाला मागे टाकण्याचा अंदाज आहे, असे सचिवांनी सांगितले.

निर्यात २०२२-२३ मधील ७७६.४० अब्ज डॉलरच्या तुलनेत २०२३-२४ मध्ये ७७६.६८ अब्ज डॉलरपर्यंत पोहोचण्याचा अंदाज आहे. मार्च २४ मध्ये ४१.६८ अब्ज डॉलरची सर्वाधिक मासिक व्यापारी निर्यात झाली.

२०२३-२४ मधील व्यापारी मालाच्या निर्यातीतील वाढीला चालना देणाऱ्या घटकांमध्ये इलेक्ट्रॉनिक वस्तू, औषधे, अभियांत्रिकी वस्तू, लोहखनिज, हातमाग उत्पादने, सिरॅमिक उत्पादने आणि काचेच्या वस्तू यांचा समावेश आहे. इलेक्ट्रॉनिक वस्तूंची निर्यात २०२२-२३ मधील २३.५५ अब्ज डॉलरवरून २३.६४ टक्क्यांनी वाढून २०२३-२४ मध्ये २९.११२ अब्ज डॉलर झाली.

औषधे निर्यात २०२२-२३ मधील २५.३९ अब्ज डॉलरवरून ९.६७ टक्क्यांनी वाढून २७.८५ अब्ज डॉलर झाली. अभियांत्रिकी वस्तूंची निर्यात २.१३ टक्क्यांनी वाढून १०९.३२ अब्ज डॉलरची झाली आहे.