Share Market Closing: निफ्टी विक्रमी उच्चांकावर बंद; सेन्सेक्स 73,150 पार, कोणत्या क्षेत्रात तेजी?

Share Market Closing Latest Update 22 February 2024: गुरुवारी शेअर बाजारात मोठी वाढ दिसून आली. सुरुवातीच्या व्यवहारात बाजारात विक्री झाली, त्यानंतर आयटी आणि वाहन क्षेत्रात उत्साह दिसून आला. यामुळे निफ्टीने प्रथमच 22,250ची विक्रमी पातळी ओलांडली. अखेर निर्देशांक 162 अंकांनी वाढून 22,217 च्या विक्रमी पातळीवर बंद झाला. सेन्सेक्सही 535 अंकांनी वाढून 73,158 वर पोहोचला.

क्षेत्रीय निर्देशांकाची स्थिती

शेअर बाजारात गुरुवारी निफ्टी बँक निर्देशांक वगळता इतर सर्व निर्देशांक वाढीसह बंद झाले. शेअर बाजारात वाढ झालेल्या कंपन्यांमध्ये बजाज ऑटो, एचसीएल टेक, आयशर मोटर्स, महिंद्रा अँड महिंद्रा, कोल इंडिया, टीसीएस आणि आयटीसी या कंपन्यांच्या शेअर्सचा समावेश होता.

कोणते शेअर्स घसरले?

शेअर बाजारातील सर्वाधिक नुकसान झालेल्यांमध्ये इंडसइंड बँक, एचडीएफसी बँक, कोटक महिंद्रा बँक, बीपीसीएल, एचयूएल, हीरो मोटो आणि एसबीआयचे शेअर्स होते.

महिंद्रा अँड महिंद्रा, मारुती सुझुकी, आयसीआयसीआय बँक, सन फार्मा, ग्रासिम इंडस्ट्रीज आणि अपोलो हॉस्पिटलचे शेअर्स 52 आठवड्यांच्या उच्चांकावर पोहोचले होते. पॉलीप्लेक्स कॉर्पोरेशन आणि व्हर्लपूल इंडियाचे शेअर्स 52 आठवड्यांच्या नीचांकी पातळीवर होते.

शेअर बाजारातील तज्ज्ञांचे मत

काही काळापासून गुंतवणूकदारांनी खासगी बँकांचे शेअर्स घेण्यास सुरुवात केल्याचे शेअर बाजारातील तज्ज्ञांचे म्हणणे आहे. मिडकॅप आणि स्मॉल कॅप शेअर्समधून बाहेर पडून, किरकोळ गुंतवणूकदार मोठ्या खाजगी बँकांच्या शेअर्समध्ये गुंतवणूक करत आहेत जे सध्या तेजीत आहेत.

मार्केट कॅपमध्ये मोठी वाढ

आज शेअर बाजारात मार्केट कॅपमध्ये मोठी वाढ पाहायला मिळाली. आज बाजार बंद होताना, बीएसई सेन्सेक्सचे मार्केट कॅप 392.19 लाख कोटी रुपये होते, जे विक्रमी पातळीवर बंद झाले. तर गेल्या ट्रेडिंग सत्रात मार्केट कॅप 388.87 लाख कोटी रुपये होते. आजच्या सत्रात मार्केट कॅपमध्ये 3.32 लाख कोटी रुपयांची वाढ दिसून आली.

ऑलेक्ट्रा ग्रीनटेक विक्रमी उच्चांकावर

ऑलेक्ट्रा ग्रीनटेक शेअर्स गुरुवारी 7.34% वाढले आणि 2,213.95 च्या विक्रमी उच्चांकावर पोहोचले. कंपनीच्या शेअर्समध्ये ही वाढ 4,000 कोटी रुपयांची मोठी ऑर्डर मिळाल्यानंतर झाली आहे. मुंबई बेस्टच्या बसेससाठी कंपनीला ही ऑर्डर मिळाली आहे.

कंपनी मुंबईत धावणाऱ्या 2,400 बेस्ट इलेक्ट्रिक बसेसचा पुरवठा करणार आहे. ही ऑर्डर 18 महिन्यांत पूर्ण होईल. गेल्या 12 महिन्यांत स्टॉक 470% वाढला आहे. सध्या तो 6.18% वाढून 2,190 रुपयांवर व्यवहार करत होता.