सबस्क्राईब करा
Share Market Closing Latest Update 8 October 2024: गेल्या आठवड्यापासून सलग सहा दिवसांच्या विक्रीनंतर आज मंगळवारी देशांतर्गत शेअर बाजाराने कमबॅक केलं आहे. सेन्सेक्स-निफ्टी चांगल्या वाढीसह बंद झाले आहेत. मिडकॅप-स्मॉलकॅप निर्देशांकानेही पूर्वीची घसरण जवळपास सावरली आहे. निफ्टी 217 अंकांनी वाढून 25,013 वर बंद झाला. सेन्सेक्स 584 अंकांनी वाढून 81,634 वर बंद झाला आणि निफ्टी बँक 542 अंकांनी वाढून 51,021 वर बंद झाला.
हरियाणा विधानसभा निवडणुकीत भाजपने सलग तिसऱ्यांदा सरकार स्थापन केल्यानंतर शेअर बाजारानेही उसळी घेतली. सलग सहा दिवसांच्या विक्रीनंतर बाजाराला ब्रेक लागला आणि गुंतवणूकदारांनी खरेदीकडे वळल्यामुळे बाजार मोठ्या वाढीसह बंद झाला. बँकिंग ऑटो , मिडकॅप आणि स्मॉलकॅप शेअर्समध्येही जोरदार खरेदी झाली.
आजच्या व्यवहारात मिडकॅप शेअर्समध्ये प्रचंड खरेदी दिसून आली आणि निफ्टीचा मिडकॅप निर्देशांक 1235 अंकांच्या उसळीसह 58,535 अंकांवर बंद झाला. स्मॉलकॅप शेअर्समध्येही चमक दिसून आली आणि निफ्टीचा स्मॉलकॅप निर्देशांक 374 अंकांच्या किंवा 2.05 टक्क्यांच्या वाढीसह 18,617 अंकांवर बंद झाला.
बँकिंग, ऑटो, आयटी, फार्मा एफएसीजी, रिअल इस्टेट, एनर्जी, इन्फ्रा, कंझ्युमर ड्युरेबल्स, हेल्थकेअर आणि तेल आणि गॅस क्षेत्रातील शेअर्स वाढीसह बंद झाले. केवळ मेटल क्षेत्राच्या शेअर्समध्ये घसरण झाली आहे.
सेन्सेक्समधील 30 शेअर्सपैकी 19 शेअर्स वाढीसह बंद झाले तर 11 शेअर्स घसरणीसह बंद झाले. निफ्टीच्या 50 शेअर्सपैकी 36 शेअर्स वाढीसह तर 14 शेअर्स घसरणीसह बंद झाले.
वाढत्या शेअर्समध्ये अदानी पोर्ट्स 4.76 टक्के, महिंद्रा अँड महिंद्रा 3.42 टक्के, रिलायन्स 2.01 टक्के, एचडीएफसी बँक 1.95 टक्के, एल अँड टी 1.83 टक्के, एसबीआय 1.59 टक्के, एनटीपीसी 1.42 टक्के वाढीसह बंद झाले.
घसरणाऱ्या शेअर्समध्ये टाटा स्टील 2.89 टक्के, टायटन 2.37 टक्के, बजाज फिनसर्व्ह 2.27 टक्के, बजाज फायनान्स 1.12 टक्के, टाटा मोटर्स 0.89 टक्क्यांच्या घसरणीसह बंद झाले.
शेअर बाजारात पुन्हा तेजी आल्याने गुंतवणूकदारांच्या संपत्तीत मोठी वाढ झाली आहे. बीएसईवर कंपन्यांच्या शेअर्सचे मार्केट कॅप 459.78 लाख कोटी रुपयांवर बंद झाले, मागील सत्रात मार्केट कॅप 451.99 लाख कोटी रुपयांवर बंद झाले होते. आज मार्केट कॅपमध्ये सुमारे 8 लाख कोटी रुपयांची वाढ झाली आहे.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.