Share Market Closing: शेअर बाजाराचे जोरदार 'कमबॅक'; सेन्सेक्स 1,300 अंकांनी वाढला, कोणते शेअर्स तेजीत?

Share Market Closing Latest Update 26 July 2024: शुक्रवारी (26 जुलै) भारतीय शेअर बाजाराने जोरदार 'कमबॅक' केले आहे. बाजार घसरणीसह उघडले होते, परंतु चांगली रिकव्हरी झाली आणि ट्रेडिंगच्या शेवटी मोठ्या तेजीसह बाजार बंद झाला.

बंद होताना सेन्सेक्स 1300 अंकांनी वाढला. निफ्टी नवीन विक्रमी उच्चांक गाठून बंद झाला. निफ्टी 24,861 च्या विक्रमी उच्चांकावर बंद झाला. बँक निफ्टी 0.91% वाढला. आयटी आणि मेटल निर्देशांकात जोरदार वाढ झाल्याने बाजाराला पाठिंबा मिळाला.

निफ्टीमधील 50 शेअर्सपैकी 47 शेअर्स वाढीसह बंद

निफ्टीमधील 50 शेअर्सपैकी 47 शेअर्स वाढीसह बंद झाले तर केवळ तीन शेअर्स घसरणीसह बंद झाले. श्रीराम फायनान्स 9.18 टक्के, सिप्ला 5 टक्के, भारती एअरटेल 4.50 टक्के, अपोलो हॉस्पिटल 4.37 टक्के, अदानी एंटरप्रायझेस 3.60 टक्के, अदानी पोर्ट्स 3.75 टक्के, विप्रो 3.5 टक्के, अदानी पोर्ट्स 3.5 टक्के हे शेअर्स निफ्टी वाढण्यास कारणीभूत आहेत.

सर्व क्षेत्रांचे निर्देशांक तेजीत

बाजारातील तेजीमुळे सर्व क्षेत्रांचे निर्देशांक तेजीसह बंद झाले आहेत. निफ्टी आयटीमध्ये सर्वाधिक वाढ झाली, याशिवाय ऑटो शेअर्स, बँकिंग, फार्मा, हेल्थकेअर, ऊर्जा, मेटल, कंझ्युमर ड्युरेबल, ऑइल आणि गॅस, मीडिया आणि रिअल इस्टेट शेअर्स वाढीसह बंद झाले.

भारतीय बाजारातील वाढीला जागतिक बाजारातून मोठा पाठिंबा मिळाला आहे. अमेरिकन शेअर बाजार गुरुवारी वाढीसह बंद झाले. त्यामुळे शुक्रवारच्या सत्रात युरोपीय बाजार तेजीत आहेत. बाजारातील या नेत्रदीपक वाढीनंतर, India VIX, अस्थिरता मोजणारा निर्देशांक 3.01 टक्क्यांच्या घसरणीसह बंद झाला आहे.

आयटी क्षेत्रात तेजी

अमेरिकेची अर्थव्यवस्था दुसऱ्या तिमाहीत अपेक्षेपेक्षा अधिक वेगाने वाढण्याच्या शक्यतेमुळे Mphasis, LTIMindTree आणि Infosys यांच्या नेतृत्वाखाली IT शेअर्स 7% वाढले. आयटी कंपन्या त्यांच्या कमाईचा मोठा हिस्सा अमेरिकेतून मिळवतात. आर्थिक वाढीमध्ये सुधारणा दर्शविणारी आकडेवारी या क्षेत्रासाठी चांगले लक्षण आहे.